مجموعة قصائد نعي مكتوبة لاهل البيت عليهم السلام
القصيدة الاولى- نعي مكتوب
يازهراء
بـاب الــمــايـرد مــحـتـاج
ويـنطي النـاس الـتگصده
خلـفـه الـزهـره عـصـروهـه
اصـحــاب الـنــبـي بــعــده
ويــن الـــمـــاعــرف ربـــه
اويــن الــخــايـن بـوعـده
يــوصــل وردت الـحـمـن
وتــمــاده وعـــبــر حــده
الـبـاب انـدفــع يـاحـيـف
بــچـف الـديـن مـاعـنـده
بـدل مـايـلــزم اعــتـابــه
ويـبـوسـه ويـحـط خـده
شـب الــنــار بــفــعــالــه
وحـيـل اجـاسر بـحـقـده
رفسـهـه الـنـاكـر الـنعـمـه
وخـلـه الـخـيــر يـتـبـده
مـا ادري اللعين اشـبـيـه
يـكـسـر خــاطـر الـورده
اكـيـد اعيونه عـميـانـات
وچانـت بـالـحـقـد رمـده
——————–——————-*
خـادم الـزهراء ع
الشاعر رعد الجريخي
القصيدة الثانية- نعي مكتوب
السلام على الزهره البتول
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
سلم يشيعي واخلص لفاطمه
يرده سلامك الله من السمه
تنور حياتك ما تضل مظلمه
ال بس ذكرها يعادل الاخره
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
توضه لحروف النور المشعشه
واذكر الزهره بالذكر والدعه
سيدة هالكون الي ما اوسعه
الطيبه الزكيه العالمه الطاهره
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
اذرف ادموعك لو ذكرت الالم
والعن عدوها الاذه والي شتم
مرات الحجايه امض من سهم
الحجايه التغث القلب تكسره
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
البس سواد اعليها والطم جزع
مظلومه واعله احبابها الهم رجع
صار الألم بيهم دمع وانجمع
سم وذبح طبره وكسرها الجره
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
الله يصبر الغايب المنتظر
مليان قلبه هسه هم وقهر
من الجره اعليهم مارحم هالدهر
لفاطمه عيونه هل دمعهن سره
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
انصب بقلبك يالمحب فاتحه
خلي العزه لا تكفض النايحه
مهضومه راحت فاطمه مجرحه
وراحت حزينه بنت خير والوره
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
زين العابدين الشمري
القصيدة الثالثة- نعي مكتوب
ــــــــــــــــــــــــــــــــــــــــــــــــــــــــ
نعي بحق للزهراء
عند خروج الزهراء خلف الامام علي
آمر عمر قنفذ بان يضرب الزهراء
رد الها يكَنفذ حيل كَلة
وبظلع الكسرتة السوط نزلة
وخليها تظل للموت علة
تدريها عليها موش سهلة
ادفعها وعلى الغبرة تذبها
واذا ناحت اريدنك تسبها
خل ترجع فلا نرحم كَلبها
تتلوة وهو بسوطة ظربها
اوجر حيل بيها وخلها تنحب
وعلى متون الزچية السوط يلعب
بكَلبها النار خلها اليوم تلهب
خل الموت منها اليوم يكَرب
عند زيارة الزهراء قبر ابوها
سلام الله يبو القاسم يغالي
يبوية اليوم كون تشوف حالي
اجيتك للكَبر مشدوه بالي
هاي اولها مدري شلون تالي
طر كَبرك يبوية الزهرة يمك
مهظومة واجر حسرة واحشمك
كون وياك مرة اكَعد واشمك
اخاف اشكيلك وحچيي يألمك
هنيالك رحت وانة بعدني
اخذني وياك بوية ولا تردني
ترة فراكَك يبو القاسم مردني
الحزن بعدك اجاني وما يهدني
شو طالت ايامي الموت وينة
يبو القاسم ترة بتك حزينة
تجر بأنفاسها كَوة الحنينة
لو تسمع وجع كَلبي اونينية
عند خروج زينب خلف امها
اوكَف بالنعش يابعد كَلبي
ما اشوفن يبو الحسنين دربي
بعد امي بعد شيفيد عتبي
عيني اعله الطريج انوب تربي
وحشة البيت يا بوية شيحملة
ونعشك امي على متونك تحملة
شلي بالبيت لو ما جوش اهلة
يكون وياچ ميتة وموش عدلة
متعودة ابحظنها الليل انامة
ييمة شلون عفتينة يتامة
بس ارسوم الچ ظلت علامة
يم طبع الحلو وحلوة الجهامة
أسالكم الدعاء رائد الاسدي
القصيدة الرابعة- نعي مكتوب
وكأني بالزهراء عليها السلام عندما ذهبت لغرفتها وهي تعلم بقرب الموت منها ……
عدلت افراش البيت كله تدري الاجل كرب محله
دمع الحزن كامت تهله ياموت ريض جـــن تكله
*
جهزت الدار ودخلت الى غرفتها …….
طبت الغرفتهه الزجيه واتمددت فوك الوطيه
حست بعد آخر مسيه وكربت وجن جته المنيه
*
وكاني بفضه لم تسمع صوت الزهراء ع
سكتت وماســـمعت حجيهه فضه انحــــبت والله ابجيهه
شنهي الجره تحجي ابنعيهه شنهي الزجيه اشصار بيهه
*
عندما دخلت رأتها متغطيه بعباءتها وهي ساكته
*
ام الحسن عدلـــه عفتهه واهواي بيدي حرحكتهه
ميته عمت عيني شفتهه يافاطمه ابجي وصحتهه
كففت دموعها ومسحتها عندما سمعت بالحسن والحسين عليهما السلام قد اقبلا وكأني بهما يسألانها يافضه
*
وين الحــنيه وين امــــــنه يافضه الحنينه
امفاركــــينه صوت المــــحنه امفاركينه
جـن حزينه جنـــج بجيتي اوجن حزينه
ماتخربـــينه شــــــــنهو الجره ماتخبرينه
*
اخبرتهم بأن امهم في الغرفه نائمه فلم يقتنعا ودخلا عليها يبكيان…
لاما اللــــــومــج كسر وجرح لا ما أللــــومج
مو وكت نومــج يمه المســـه مو وكت نومج
ندري اهمــومج اهوايه وتعب ندري اهمومج
انشمهن اهدومج بيهن عزه انشمهن اهدومج
**
وكأني بالحسن حرك امه فلم تتحرك فبكى وقال للحسين ع….
ياخويه امنه ماتت صدك ياخويه امنه
ام المحــــنه راحت يخـــــي ام المحنه
نكطع الضنه لاما ترد نكطع الضنه
ماتكعـــد النه يبن أمي لا ماتكعد النه
*
بارد حضنهه اسم الله وعلي بارد حضنهه
يرمش جفنهه ساكت ولا يرمــــش جفنهه
لاجنـي ابنهه صحت اشكثر لاجـني ابنهه
ماتت اضنهه يحسين شــــو ماتت اضنهه
*
وكأني بالحسن كشف وجه امهه وصاح
ترحين عــني شنهو السبب ترحين عني
بجي او وني مافززج بجـــــــي اوني
ينكطع ضني منج صدك ينكــطع ضني
جني وجني ميت عدل جنـــــي وجني
*
طاح ويشــــمهه حسين انحــــنى طاح ويشمهه
دار ايده ضـمهه فوك الصدر دار ايده ضمهه
حبهه ابـــجدمهه اتمدد بجــه وحبهه ابجدمهه
بارد جســـــمهه شاف ولمس بارد جســـمهه
*
وكأني بهما ذهبا الى ابيهما واخبراه بموت امهما فاطمه ….
طاح وعثر من سـمع بيهه
حيدر علي ينحـــب عليهه
حاضن غده وايشــم بنيهه
يلعن صبــــــح بالجاتليهه
*
هابعد صار البـــيت عنه
كلسا وكع راعي المحنه
مذهول رايه وتاه مـــنه
موتته كرب مـنه وتدنه
وعندما وصل الى الدار بكى كثيرا عند جنازة الزهراء ….
ردنه العمر نكضيه سويه
ها يالعزيـــــــزه يالزجيه
معقوله شو شلتي المسيه
وعفتي اليحـــبون بعزيه
*
وقام الامام علي عليه السلام لتغسيل وتجهيز فاطمه ع …
*
ايغسل الزهــره مد ايده علي ايغسل الزهره
والدمعات عبره صب الماي والدمعات عبره
مرت بكســــــره ايده اعله الضلع مرت بكسره
دك اعله صدره ناح اشــكثر دك اعله صدره
*
وكأنما ابو الحسن ترك تغسيل فاطمه واجهش بالبكاء وهو واضع رائسه بين ركبتيه ……
هلت ادمــــــــوعه راعي الحمـــى هلت ادموعه
دك على اضلوعه من الحزن دك على اضلوعه
روحه مفجــــوعه من الكســـر روحه مفجوعه
بجمره ولـــــوعه دك هامته بجـــــــمره ولوعه
*
وكأني اخاطبهه ريتك حاضر يا ابالحسن يوم عاشوراء وترى الاضلاع المهشمه بحوافر الخيول …
ريتك حضرته حسينك علــــــي ريتك حضرته
ويلي نظرته ضامي ويون ويلـــــــــي نظرته
تلهب جمرته من العطش تلهــــــــب جمرته
ينعه بحسرته صوب الخيم ينـــــــعه بحسرته
*
كلبك تفطــــــر لو حاظــــــــره كلبك تفطر
صدره تكســر يا بالحســـــن صدره اتكسر
مو ضلع اكثر منه انطحن مو ضـــــلع اكثر
داير العســـكر فوك الولـــي ايهوس العسكر
*
يايوم عاشـــر صعب وكلـــف يايوم عاشر
تعمي النواظر من البجي تعمــــي النواظر
يكسر الخاطر يحسينك علي يكسر الخاطر
دبج الحـوافر فوك الصــــدر دبج الحوافر
*
ابو علي الركابي
القصيدة الخامسة- نعي مكتوب
نعي «نصاري» لسان حال الزهراء “عليها السلام”
الشاعر الشيخ كاظم المنظور الكربلائي
“رحمه الله تعالى”
عگب عينك يبويه تعلم إشصار
بيّه وإشجره إبحالة الكرار
عله إفراگك مسهره إبليل وإنهار
إو عيني إتفجرت والدهر فجار
إو نار الباب وجّت بالگلب نار
إبكسر ضلعي إو صدري إنصاب بسمار
إو محسن سگط مني إبعتبت الدار
يبو إبراهيم ما تخفاك ألأخبار
إو مچتوف إبوصيتك حامي الجار
طلع مچتوف وإتحف بيه ألأخطار
إطلعت خلفه إو شفته الدهر جار
بمتوني رسم للصوت آثار
الشاعر الشيخ كاظم المنظور الكربلائي
“رحمه الله تعالى”