لطميات مكتوبة لمولاتي فاطمة الزهراء عليها السلام

المشهد: أمير المؤمنين ع يشكو فراق الزهراء ع ويصور بلسان الحال حالته وايتامها من بعدها .

               أمل الروح

فاطم .. يا شمعة سنيني الطفت
فاطم .. نجمت حياتي الي اختفت
فاطم ..يا ويلي لضلوعي حنت .. فاطم
ـــــــــــ
هنا يشمس الفاركَتني المغربيه .. وعمري اظلم .. من بعدها
ماي دنياتي تبدّه من اديّه .. شلون يلتم .. من بعدها
اوكَف واكعد ونادي يالزجيه …والدمع دم .. من بعدها
ظهري … بس الزجيه كسرته
ظهري …والغالي هيّه البچّته
ظهري …ضل محني من يوم المشت …فاطم
ــــــــــــ
ضاعت سنيني وخسرت الدنيه كلها ..من مشيتي .. يالزجيه
يا امل روحي بغيابج راح املها … وطاح بيتي … يالزجيه
شما اصد محرابج ادموعي اهلها … ومن بچيتي .. يالزجيه
حالي .. ما ينوصف يم الحسن
حالي … كل عمري وياج اندفن
حالي …واركاني كلها اتضعضعت .. فاطم
ـــــــــــــ
شما اشم دخان من اعواد بابي .. الحسره تكبر .. وافرك ايدي
ينمرد كَلبي اعله فكَدك وبمصابي …الجمره تسعر … وافرك ايدي
ويّه مسمار الكسر ضلعچ عتابي .. من تجاسر .. وافرك ايدي
صوره … هيج نه اصد يم عتبتچ
صوره ..طحتي وتجارت دمعتچ
صوره …ضلوعچ عجيبه اتكسّرت .. فاطم
ـــــــــ
آنه يم كَبرچ اروح بكل مسيه ..اترابه اشمّه .. ويجري دمعي
وأقره الچ قران كل ليله هديه .. بليله ظلمه … ويجري دمعي
وزينب اخذها وحسن وحسين اخيّه .. وحزني اقيمه … ويجري دمعي
ماذا .. غل من يشم كَبر الطهر
ماذا .. حكَ لوتمنه بالكَبر
ماذا .. ولاده وي روحه اتيتّمت .. فاطم
ـــــــــــــــــ
شلون اصبر يل مشيتي وخدّچ احمر .. بضربه منهم … يا مصيبه
وقرطچ من الضربه يالزهره تناثر .. من حقدهم .. يا مصيبه
صدرچ القرآن يا فاطم تكسّر …ارجاس لنهم .. يا مصيبه
خدّچ … للچف شفت طابع اثر
خدچ … والمصحف شلون انسطر
خدچ … الدين الله وادم انكرت … فاطم
ــــــــــــــ
الشاعر محمد حسن

قصيده للزهراء عليها السلام
تنفع نعي ومقدمه وشور

ليش عالخد ايدچ اتخلّينها
وعينچ اشما جيتچ اتغمضينها
ــــــ
يامهجتي وكلشي بالدنيه الي
شيلي راسچ يالحنينه وصدلي
جاوبي مو منكسر خاطر علي
عشرتي ماضن ابد تنسينها
ـــــــــــــ
ليش كل ماجيتچ اتديري الوجه
وعينچ اعله الباب اصدها تتجه
لا تضنّي الحالتچ ما منتبه
چلمه المأذيتچ انتي احچيها
ــــــ
ليش محنيّة ظهر يا فاطمه
تبچي زينب چن احس اميتّمه
اباب داري صرت اشم ريحة دمه
لون احمر اثر بان اعليها
ـــــــــــ
ونّتچ يم الحسن هدّتلي حيل
وعل وجن شنهي السبب دمعچ يسيل
يم كَلب بالكون ما منّه مثيل
دنيتي بدونچ فلا حن ليها
ــــــــــــــــ
يم حسن انظر اثر يم الجفن
كَوّه نفسچ ليش ضلّيت ابحزن
تبچي عينچ من تصدّي للحضن
شبي المحسن الي الشكوه اشكيها
ــــــــــــ
تكَله سطروا عيني احس راح النظر
وخدي يابالغوث والله انسطر
الباب دفعوه الصدر حيل انكسر
وداري نار الكَوم شبّت بيها
ــــــــــــ
راح محسن والمهد حسره بكَه
والجنين الام حريمه اتفاركَه
بعد ماجه الدنيه محسنّه اشلكَه
ابطني وهروشه العده امكَطعينها
ـــــــــــــ
الشاعر محمد حسن ضيغم

المشهد: السيدة زينب عليها السلام تنعى فقد امها الزهراء عليها السلام بعد تجهيزها وتطلب المثول أمام النعش الشريف لتندب آلامها بفقد الطهر فاطمة عليها السلام.
 
اللحن : ازكي الصور ماي

         نعش الطهارة

وين النعش وين .. اخذوني يمّه
ارد اشبگ اعليه .. واندب ييمه
ماينحمل فرگاها
اتمنه اموت وياها
هاي ام الحسين
……
طبع اليفارگ كل وكت
تخلص حياته ابدمعه
وانه الشفت صدر الطهر
اشلون كسروا ضلعه
زينب ييمه راح اضل
لاخر نفس منفجعه
الله يساعد كل شخص
نعش العزيز ايشيعه
مايهدأ البال .. صبح ومسيه
كل لحضه اصيحن .. آ يالزجيه
روحي انگطع رجواها
اتمنه اموت وياها
هاي ام الحسين
……

عافتني امي ومن مشت
ضلت صورها بعيني
فراگ الحنينه جمرته
بين الضلع تچويني
ماصدكت عني ارحلت
وبوحشتي اتخليني
لو بيدي انطي الفاطمه
كل العمر وسنيني
فدوه الهه الاعمار .. فدوه الها كلشي
وي امي ياريت .. شالولي نعشي
ماارهم بلياها
اتمنه اموت وياها
هاي ام. الحسين
……

دنيا بلا ام والحسن
ماتسوه عندي ذره
وانه الفكدت بهل عمر
وماكو اغله من الزهره
كلما اصد باب النزل
تحرگ دليلي الحسره
الفاگد فلا يبطل الدمع
ماعنده شي ايصبره
شگد احمل جروح… وانحب عليها
ذيچ الي چانت… تضمني بأديها
جا وين بعد الگاها
اتمنه اموت وياها
هاي ام. الحسين
……

ارحمني يا هذا الزمن
مااحمل انه جروحي
زغيره عمر ليش ابحزن
اگضي العمر وبنوحي
زينب واصيحن فاطمه
من فدوه لسمچ روحي
ومحسن اخيي من وگع
ناديته يا مذبوحي
ابن امي منصاب .. ومسماره شاهد
ياوكتي ناديت… بزينب شرايد
مصيبه هلي انعاها
ياريت اموت وياها
هاي ام الحسين
… .

كل لحضه تتجسد صور
ضلع امي حين اتكسر
وانظر الخد الطاهره
من السطره اصبح احمر
محسن وگع وامي غدت
فوگ الترب تتكوّر
اتحمل امصاب الجره
ها يا زمن مااگدر
مكسوره الضلوع .. والدم بديها
راح ابچي كل يوم .. وانحب عليها
روحي الزمن اذّاها
ياريت اموت وياها
هاي ام الحسين

الشاعر محمد حسن ضيغم

لو حاظر ابذاك الوكت … يعباس
وتشاهد ابعيني اشّفت … يعباس
من عصروا امي الطاهره
صاحت اضلوعي امكسّره
ـــــــــــــــ
زينب يم اخوهه كَعدت الليله
عن محنة الزهره بدمعه تحجيله
دخّن ابو الغيره ومدمعه ايهيله
راد الكون كلّه ابيمنته ايشيله
كَالتله شحجي اعله الجره … يعباس
يا مره التصبر يا مره … يعباس
احاه يسبع الكَنطره
صاحت اضلوعي امكسّره
ـــــــــــــــ
ذب جفّيته فوكَ الكَاع ابو الغيره
وصاح شلون امي ضلّت ابحيره
ها يم الخدر هل فاجعه جبيره
شلون اتحمّليتي وانتي ازغيره
بعيوني اصد بيتي اشتعل … يعباس
دمعي ويدمع امي انهمل … يعباس
بالدار نار اموجّره
صاحت اضلوعي امكسّره
ـــــــــــــــ
شاف ادموع زينب ضل يناشدهه
يامحنه الجبيره الهل وكت عدهه
صاحت خويه والحسرات تضهدهه
شكَلك خويه امي انسطرت ابخدهه
والعين حمره يا شهم … يعباس
هل جرح يبقى منلجم … يعباس
هل حال صعب اتصوّره
صاحت اضلوعي امكسّره
ـــــــــــــــ
خويه الخلّه دلالي ذبل حيله
خلف الباب امي ويدفع ابحيله
محد يمّي حاظر حتى اشكيله
بالعتبه اسكَطت والمدمع اتهيله
دم محسن ودم الصدر … يعباس
بالعتبه شفته منحدر … يعباس
بيدي امسحت دم الجره
صاحت اضلوعي امكسّره
ـــــــــــــــ
خويه الباب ناره اموجّره ابروحي
شماصدّن اله يطفح لهب نوحي
علطول الباب بيدي راسمه اجروحي
ابجي اعله الزجيه لو المذبوحي
ليل اليمر اشبع قهر … يعباس
من دهري شفت آنه الامر … يعباس
كل ليلي ابقى امساهره
صاحت ضلوعي امكسّره
ـــــــــــــ
الشاعر محمد حسن ضيغم

ذكرى استشهاد الزهراء ع
١٤٤٢هـ

     عالوعد       والعهد
نحي الليالي الفاطميه جينه
©©©©
ابثوبي الاسود وبدموعي وهذا حالي
احظـــر المجلس اجيت وراسي عالي
والله اعــــــوف الدنيه كلها وما ابالي
اولا اعـــوفن ليله مـــن هاي الليــالي
   عهدي أنه    ابكل سنه
نحي الليالي الفاطميه جينه
©©©©

هالمجــالس هيه عشـي وهيه بيتي
وهالمـــنابر هيه المكبـــرتلي صيتي
خادم الزهـــــراء مكتــوب ابهويتي
وابقـــه انعاهه لحد ســـاعة منيتي
     بمدمعي      والنعي 
نحي الليالي الفاطميه جينه
©©©©

لو قره الناعي وذكــــر كسرت ظلعها
عيــــني من دم يبقه يتفايض دمعها
الزهره ورده اومو شريف ألي گطعها
دين ماعنــــــــــده الضربها والدفعها
   اتحزمت    حشمت
نحي الليالي الفاطميه جينه
©©©©

اهواي عــــدوان الزچيه وقله الاحباب
وگعو منها الجنـــــين ابعصـــرت الباب
ابيا ذنب ضربو متنهه وشنهو الاسباب؟
اليدعون اصــحاب هسه انگلبو اذياب
      بالهظم    والطم
نحي الليالي الفاطميه جينه
©©©©

شكبر بختي وصــرت خادم للزچيه
وربحي بالدنيه الولايه الحيــــدريه
ناجح ابحب الزچيه وخــــذت ميه
حيل ادگ صدري عليها ابهل مسيه
    ابهل ذكر     نستمر
نحي الليالي الفاطميه جينه
©©©©

ريت هاي اليله وي حامي الحميه
انشـــارك ابتشيعها وننصب عزيه
فايز اليحـــــــيي اليالي الفاطميه
ترضه عنه فاطمه وسيد البريه

انضل خدم بالالــم
نحي الليالي الفاطميه جينه
©©©©
     الخادم
كامل السعيدي

انتي بخيمتچ نار وانا بضلعي بسمار
زينب زينب
*
يمه زينب خل نسولف… كل الامصاب
انتي احچي بخيمتچ…وانه احچي عل باب
ادري بعده الطف ييمه … وذاك الاخظاب
هذي فرصه يمه باچر… ماكو احباب

ارد اسمعلچ اخبار وانا بضلعي بسمار
زينب زينب
*
ابتدي ابابي يزينب …. ونتي سمعي
لا تمسحينه امن اسولف …. يمه دمعي
الدفع بابي عليه …. شاف وضعي
چان بي بسمار يمه …. وجاس ضلعي

يدفع بابي بصرار وانا بضلعي بسمار
زينب زينب
*
امن الضلع بسماري يمه …. ما سحبته
روحي شاغت والكسر …. بذني سمعته
امن الالم طايح جنيني …. ماعرفته
ادري حس ابضلعي ابني…. ومات سكته

مات بعتبة الدار وانا بضلعي بسمار
زينب زينب
*
هسه زينب خبريني …. بذاكه طفچ
بسرعه جاني الموت يمه …. ارد اسمعچ
إرتبكَ لمن حچيتي …. ليش وضعچ
يمه چنه ارماد خيمه …. لاح وجهچ

شنهو بذهنچ الدار وانا بضلعي بسمار
زينب زينب
*
إشكي كل هموم گلبچ …. يمه زينب
الحالتچ يم المصايب …. رايده انحب
من اعوفچ يالعقيله …. الدنيه تصعب
يلله يمه اگبالي هسه …. شدي معصب

ارد ابچیلچ انهار وانا بضلعي بسمار
زينب زينب
*
من يطيح الغالي باچر …. غمضي العين
يختلف يايمه ضلعي …. وضلع الاحسين
صدره ينداس بحوافر …. يمه مرتين
خايفه اتموتين بعده …. ما تصبرين

هوه بنحره اشفار وانا بضلعي بسمار
زينب زينب


الشاعر اياد الديراوي