مجموعة من القصائد الحسينية المكتوبة لمحرم الحرام

بقلم الشاعر السيد زيد الفحام

المجموعة الاولى

محرم_جاي

يخدام الحسين حسينكم نعمه
محرم جاي شدو الحيل للخدمه
هيّئوها المواكب والحسيّنيات
من هسّه الملائك بيها ملتمّه
رايات الحزن نشروها عالابواب
بس حسين بيها ينكتب اسمه
حَضرو دموعكم للمقتل بعاشور
وصدور اللطم حضروها للطمه
بعد چم يوم يوصل للطفوف حسين
بسيوف ال امية ينسفك دمه
راسه عله الرمح ينشال واويلاه
وبخيل آل امية ينسحك جسمه
انصاره وبنينه وخوته الطيبين
ينذبحون ويلي بكربله يمه
زينب عكب اخوها حسين والعباس
مسبيه تروح بروح منهضمه
للشام العقيله وتدخل الديوان
مضطرّه يزيد تردّه وتكلمه
تتفرج عليها الناس والعدوان
وعيون الشماته اسهام مزدحمه
شلون انواسي زينب كولو ياخدام
واجب كل صدر بچفوفنه انهشمه
اذا من دم دموع المهدي ليل انهار
لازم من دمعنه عيونّه التعمه

سيدزيدالفحام

سيد زيد الفحام, [١٤.٠٧.٢١ ٢١:٣٣]
قصيده لأستقبال محرم الحرام

كل الحُسيّنيـات هيّئـوها
راية مصاب حسين نشروها
مشهوده كل عام
ألـكـم يخـــــدّام
لا تقصرون. لا تقصرون
…………..

لهالشرف تغبطكم املاك السموات
من تخدمون الحُسين البالعطش مات
تنزل عليكم الرحمه والصلوات
وبالقيامه وجوهكم تسطع ضويّات

من هسّه يالخدام همّتكم
كون بمحرّم تسوه وگفتكم
بالمحشر اوسام
ألـكـم يخـــــدّام
لا تقصرون. لا تقصرون
…………..

يالله ياخدام ابواليمه الاكارم
استعدّوا للعَزَه عاشور قادم
الف هنياله الصبَح لحسين خادم
مثل حمزه ونيّة المنضور كاظم

اگبل محرم يالتعشگونه
خدمو الحسين ولاتعوفونه
تضحيته بالهام
ألـكـم يخـــــدّام
لا تقصرون. لا تقصرون
…………..

ادري بيكم بالمجالس ما تقصرون
احضر وياكم وشارك من تحضرون
فاطمه آنه الزجية يالتسئلون
واسو گلبي بالمناحه ودمع لعيون

ابچوا لمصاب وليدي وجروحه
ذابت يويلي امن السحگ روحه
ونسولف آلام
ألـكـم يخــدّام
لا تقصرون. لا تقصرون
…………..

يالله يالرادود اقره وحضّر اطوار
وانت يالشاعر اسنده وكتب اشعار
ياخطيب المنبر اقره بلوعه وعبار
هذا شهر حسين اجاكم ونتم انصار

اقـرولي عالداستـه الخيّاله
عالمات ضامي وسحگو اطفاله
صرخات الايتام
ألـكـم يخـــــدّام
لا تقصرون. لا تقصرون
…………..

ذكروا زينب بنتي من راحت سبيه
عالهزل مچتوفه ما بين آل اميه
من عكب عباس سبع الغاضريه
تدخل الشام العقيله الهاشميه

بسوگ النواصب ويلي مشّوها
الماشافو خيال الهه شافوها
قصتها بالشام
ألـكـم يخــدّام
لا تقصرون. لا تقصرون
…………..

آنه ام حسين امكم يالتخدمون
عندي حقكم مايضيع شما تتعبون
بيدي اسجّلكم خدمنه لا تخافون
وباجر بيوم القيامه ما تحزنون

كلمن بچه عله حسين منعوفه
نغفر ذنوبه ابدال معروفه
والخدمه ايام
ألـكـم يخـــــدّام
لا تقصرون. لا تقصرون

سيدزيدالفحام

سيد زيد الفحام
قصيدة لأستقبال محرم الحرام 2021

شهر لمحرّم هله بالدمع استقبله
هيّئت روحي اله فاطمه يافاطمه
………………..

اقترب شهر الذبيح المات عطشان
هيّئت روحي ولبسته ثوب الاحزان
للطم صدري احسّه هواي لهفان
ارد اواسي بالشعاير اغله انسان

اقترب شهر الدمع گلبي من هسّه انفجع
ابتدي من كربله. فاطمه يافاطمه
………………….

ما بقت ايام شدّو للعزَه الحيل
بالسمه ينشر قميصه يصيح جبريل
هذا شهر المات ضامي داسته الخيل
واني لستقبال شهره دمعتي تسيل

شهر ابواليمّه اجه. والتعب لجله نجه
صوتي بالدمعه عله. فاطمه يافاطمه
………………….

كلشي خل نتحمّل ولانخذل حسين
والمرض ما ييقه يشفه بدمعة العين
مثل ابوالسجاد يحصل بالبشر وين
كون من يگبل محرّم مستعدين

لا يظل بغربته. بالمجالس نصرته
والطريق انواصله. فاطمه يافاطمه
……………….

فاطمه مولاتي امرچ وانه ممنون
جهّزت نفسي لمحرم خل يسمعون
آنه بحسين الحبيب وحبه مجنون
بگلبي شفت حسين والله مو بالعيون

مجلس حسين الفرض. ما يهمني اي مرض
والمرض اتحمّلَه فاطمه يافاطمه
…………………..

بالله ياخدام زينب لا تقصرون
بالمجالس هيه تحضر من تحضرون
هيه والزهراء يبچن من تنوحون
يشفه جرح حسين لاشك من تلطمون

كل محرّم من يهل للمجالس ننتقل
والعَــزَه نتكفّـــلَه. فاطمه يافاطمه
……………………..

حضّرت زنجيلي اني وثوبي الاسود
ولشهر عاشور ادعي عمري يمتد
حتى ألطم بالمواكب ناري تبرد
غايتي حسين ومصابه الله يشهد

هذا عهدي للأبــد وانه ماخون العهد
اي وحق عقد الوله فاطمه يافاطمه
…………………….

الراية حمره وتعني ثار حسين قائم
ما بقـت ايّــام ونبــدلهـــه لازم
سوده تعني للحزن انشر يخادم
اندگ سواد عله المنابر والمآتم

گلبي للعاشر يحن. لا حياة بلا حزن
عالذبيح بكربله. فاطمه يافاطمه

سيدزيدالفحام

سيد زيد الفحام,
مقدمه هلالية 2021

عذاب عذاب شهر المحرم كافي تچويني
عذاب عذاب لمّن يهلّ اهلالك بعيني
…………..

آنه زينب ما شفت كل عمري راحه
لسّه گلبي مخزّن وتنزف جراحه
چن هلالك يامحرم سهم لاحه
وانت تدري دمعي جف امن المناحه

سهام سهام. انظر هلالك گام يرميني
عذاب عذاب لمّن يهلّ اهلالك بعيني
……………

اخفي عن عيني هلالك يامحرم
ما بقت بعيوني دمعه ابچي من دم
ونار گلبي التچوي من نار المخيّم
گلبي بمصاب اخوتي ذاب وتألّم

جروح جروح عاشر محرم بيه تكفيني
عذاب عذاب لمّن يهلّ اهلالك بعيني
……………

آنه زينب ما نظر واحد خيالي
يامحرم بيك اذّتني الليالي
عذبتني وتالي صار شلون حالي
عالهزل مسبيه من عكب الغوالي

مصاب مصاب. اعظم مصيبه الشمر يسبيني
عذاب عذاب لمّن يهلّ اهلالك بعيني
……………

بعاشر ايامك تمنّيت المنيه
ولااشوف حسين طايح عالوطيه
مكسّره ضلوعه بحوافر خيل اميه
عالرمح مرفوع راسه يصد عليه

اصيح اصيح يبن امي يامذبوح حاچيني
عذاب عذاب لمّن يهلّ اهلالك بعيني
……………

لا تهل بعيوني يهلال الفجيعه
شيّبتني وآنه بت حامي الشريعه
گبالي بالطف ذبحوا حسين ورضيعه
والكفلني چفوفه عالشاطي گطيعه

كفيل كفيل ضحّه بچفوفه حتى يحميني
عذاب عذاب لمّن يهلّ اهلالك بعيني
……………

شلّك علية بحزن آنه الحزينه
ذكّرتني ابطبّت الشام وسبينه
من دخلنه السوگ وحبال بأدينه
الناس كلها تجمّعت تنظر علينه

يزيد يزيد. وسفه بشماته هناك ياذيني
عذاب عذاب لمّن يهلّ اهلالك بعيني

سيد زيد الفحام

سيد زيد الفحام, [٢٢.٠٧.٢١ ١٥:٤٠]
هلالية رئيسية 2021

جرحك ياشهر بعيوني ما طاب ينزف للمنيه
ذبحو روحي بيك وكل الاحباب يوم الغاضريه
ياشهر المصيبه
خلّوني غريبه. يوم الغاضريه
……………..

ياشهر عاشور عندي وياك عتبه
گلبي ما يحمل مصايب لا تعذبه
بيك ذبحو اخوتي وكل الأحبّه
شوفت اهلالك علية هواي صعبه

بيك مصاب اخوتي وسبيّ للشام ما انسه الجرالي
هلالك يرمي عيني وگلبي بسهام. بغياب الغوالي
مسبيه وسليبه
خلّوني غريبه. يوم الغاضريه
……………..

اخفي عني اهلال بدرك لا تهلّه
كافي تجرح گلبي اكثر لا تعِلّه
كل خليل يموت لوما شاف خِلّه
واني خِلّي گطعوه بسيوف كلّه

ابن امي انذبح وبعيني شفته. طايح عالوطيه
مگطع بالسيوف ودامي عفته. وخذوني سبيه
والشيبه خضيبه
خلّوني غريبه. يوم الغاضريه
……………..

هلالك يذكّرني بجروح الفجيعه
يشبه القوس الرمه حسين ورضيعه
وصاب عين الكافل بجنب الشريعه
صوّبتني وصوّبت گلب الوديعه

ريتك لا تهل ياشهر الاحـــــزان. يمسبّب عذابي
ذبحو بيك اخويه ومات عطشان. وتجدد مصابي
ساعات العصيبه
خلّوني غريبه. يوم الغاضريه
……………..

ياشهر عاشور اقسم من شفتهم
حسين والعباس اخوتي ما عفتهم
آني زينب ياشهر عاشور اختهم
بعاشر ايامك ضحايا فارگتهم

دارت ضدنه بيك الدنيا والناس. ياشهر الفجيعه
ابن امي انذبح ونصاب عباس بچفوفه الگطيعه
راح منين اجيبه
خلّوني غريبه. يوم الغاضريه
……………..

اصعب جروحي واشدهن لسّه ما طاب
ياشهر جرح السبي ما بين الاجناب
عالهزل مچتوفه راحت ام لحجاب
من عكب عباس حيره ودمعي سچاب

زينب آنه ودخل مجلس يزيد. ما مر عله بالي
استر وجهي من يسألني بالأيد. حال الضيم حالي
مفجوعه وتريبه
خلّوني غريبه. يوم الغاضريه

سيد زيد الفحام
________________________&

سيد زيد الفحام, [٢٢.٠٧.٢١ ١٥:٤٢]
نزلة هلالية 2021

ياشهر الاحزان بهلالك دمه
ياشهر الاحزان جرحك بالسمه
……..

هل هلالك بالمصيبه جدّدت بينه الألم
بالدموع الفاطميّة رحّبت بيك الخَدَم
وجّرت جمره بصدرنه جمره من نار الخيم
كل موالي اباب بيته للحزن رافع علم

مفجوعه لليوم ارحم فاطمه
ياشهر الاحزان جرحك بالسمه
……..

حضّريناها المجالس والمواكب والدمع
نشارك الزهره حزنها عالذبيح المنصرع
اسود الزهره لبسهه كل محرم تنفجع
لازم نواسي ظلعها باللطم نكسر ظلع

عالگلبه مفطور من كثر الضمه
ياشهر الاحزان جرحك بالسمه
……..

ساعه ساعه نبقه نحسب عن قدومك ياشهر
باقي منّ العام بينه جمره ودموع واثر
ياجسم بيك التگطّع ياصدر بيك انكسر
جسم ابوالسجاد هذا ونگطع منه النحر

عالغبره مذبوح سلبوا خاتمه
ياشهر الاحزان جرحك بالسمه
………..

ياشهر نحيي المجالس بيك ونقيم الأمُر
لخاطر حسين ابواليمه مو لجل دنيا واجُر
نذكر مصابه ونخدمه ماكو بينه اليعتذُر
ونذكر مصاب العقيله الراحت بنوگ اليسُر

وتخلّدت بيك. اعظم ملحمه
ياشهر الاحزان جرحك بالسمه
………….

بيك ياشهر المصيبه ذبحوا حسين وهله
فجعو الهادي مُحمَّد والزچيه ابمقتله
وزينب الشيّب گلبهه من مصايب كربله
عالهزل راحت سبيه مچتّفه ومتعلعله

شَوف آل اميه. ياريت انعمه
ياشهر الاحزان جرحك بالسمه
………….

احنه خدام ابواليمّه عالعهد طول الزمن
عدنه بس حسين غالي ما نقيسه بأي ثمن
كل سنه انجدد عزانه عالأمام المؤتمن
نبقى نهتف وا حُسيناً حد ظهور ابن الحسن

هاي المجالس تبقى قائمه
ياشهر الاحزان جرحك بالسمه

سيد زيد الفحام

سيد زيد الفحام, [٢٢.٠٧.٢١ ١٦:٣٧]
قصـائــد ليلة الخدمة

سيد زيد الفحام, [٢٢.٠٧.٢١ ١٦:٣٨]
مقدمة للخدمه 2021

بالروح جمر مصابك
مجروح. انعه ابابك
……….

ربيت بخدمتك من زغري يامولاي
مو ميت احسّك كل وكت ويّاي
اذكرك ياحبيبي حسين وكت الماي
ضامي بلا ذنب ذبحوك عالغبره

ياريت. بية اصوابك
مجروح. انعه ابابك
……….

اليخدمك الله يرفع قدره ويحبّه
يهنياله التحبّه وتدخل بگلبه
دخيلك اسمي وي خدامك تكتبه
امشّي عليك امك فاطمه الزهره

محسوب منّ احبابك
مجروح. انعه ابابك
……….

اتنفّس هواك الينعش الريّه
حبّيتك لأنّك تعلم شبيّه
اذا انساك انت التنشد عليّه
رؤوف عله اليحبك طبعك تسرّه

ينزار حتى اترابك
مجروح. انعه ابابك
……….

لبست ثياب حزني وحضّرت روحي
محرم والشعائر بلسم جروحي
اظل مديون عمري شما كثر نوحي
انوح عليك حبّاً بيك عالفطره

مسلوب. حتى ثيابك
مجروح. انعه ابابك
……….

تهيج بكل محرم جمرة احزاني
اعيش بعالمك يحسين شي ثاني
حاضر بالمجالس دوم تلگاني
عله مصابك انوح واسچب العبره

ما راح دم خضابك
مجروح. انعه ابابك
……….

اظلّ بخدمتك ما اترك الخدمه
وعطرك سيدي بالمنبر اشتمّه
دخيلك نظره رايد يا ابوالرحمه
بجاه الگطعو برمية سهم نحره

ناديت يمّ عتابك
مجروح. انعه ابابك

سيد زيد الفحام

سيد زيد الفحام, [٢٢.٠٧.٢١ ١٦:٤٠]
رئيسية للخدمه 2021

خادم. لحسين ياناس افتخر
خادم ما اوفي لو اگضي العمر
خادم من مولدي ليوم الحشر
خادم خادم
………………..

خدمتي لحسين مولاي وامامي
هيه سر ايجاد روحي وعتصامي
من عزاء المأتم ابعثله سلامي
بهالمجالس ابقه حاضر بلتزامي

روحي تهوى المجالس واللطم
روحي والله بمصابه تنهظم
روحي تبقى لمحرّم تنتظر
خادم خادم
………………..

آنه لوما حسين ما عيش بحياتي
ابقه اخدم ولطم لساعة وفاتي
عندي تعظيم العزَه من واجباتي
تبقى ايام المشي كل ذكرياتي

دمعي. لمصاب ابوالاكبر يصب
دمعي ما يطفي نيران الگلب
دمعي. ينزل عله خدودي جمر
خادم خادم
………………..

حزامي شدّيته بمحرّم للخدامه
لطمت ايدي بصدري تشهدلي علامه
بالقبر تشهدلي وبيوم القيامه
خادم حسين وعشت عمري بغرامه

تشهد دمعاتي ما عفت البچي
تشهد. ولساني لو مابي حچي
تشهد. لمّن ينزلوني الگبر
خادم خادم
………………..

( اني غير حسين ما عندي وسيله )
ابچي لمصابه وأون مثل العليله
ارد اواسي بدمعتي دمع العقيله
من مشت مسبيه عالناگه الهزيله

صعبه زينب خذوها ميسّره
صعبه. من دون سبع الگنطره
صعبه. تسمع شتم سوط وزجر
خادم خادم
………………..

خدمتي لحسين عنواني وهويتي
كربله وعاشور والمقتل قضيتي
والمجالس روحي بيها وهيه بيتي
وريت بيّام المشي تحضر منيتي

هايم بالخدمه وايام المشي
هايم. بطور النواعي انتشي
هايم. بحسين مو لجل الاجر
خادم خادم
………………..

كل محرم من يجي اعلن عزائي
لا تلوموني بدمع عيني وبكائي
اني بس لحسين ياناس انتمائي
شما اقدم عندي تقصير بوفائي

عهدي. لحسيني خادم للأبد
عهدي. من دمي خطّيت العهد
عهدي. مقصّر وجيتك اعتذر
خادم خادم

سيد زيد الفحام

سيد زيد الفحام, [٢٢.٠٧.٢١ ١٦:٤١]
نزله للخدمه2021

خدمة حسين الشرف والغايه
وانه للخدمه ارفعتها الرايه
……….

من يهل عاشور شهر الضامي
آنه للخدمه اشد حزامي
چن اشوف الواقعه گدامي
والحبيب حسين طايح دامي

اخدم بأفعال مو بحچايه
وانه للخدمه ارفعتها الرايه
……….

حسين ديني ودنيتي وعنواني
لخدمته رب العرش سوّاني
للحُسين وما مشيت لثاني
بالمجالس كل وكت تلگاني

جايب اشواگ العشگ ويّايه
وانه للخدمه ارفعتها الرايه
……….

عالمجالس واللطم تربيتي
كل محرم رايه ادگ ابيتي
گلبي مغرم بالحُسين ونيتي
كون اموت بحضرته امنيتي

حتى يرويني الامام ابمايه
وانه للخدمه ارفعتها الرايه
……….

عندي تعظيم الشعائر واجب
ما منعني بخدمتي اي حاجب
كلمه خل يسمعها مني الناصب
ما اعوف حسين بالدم كاتب

اية التطهير اعظم آيه
وانه للخدمه ارفعتها الرايه
……….

للمواكب حضّرت زنجيلي
للعزَه شدّيت عزمي وحيلي
وگضي بدموع المجالس ليلي
وفاطمه ام الحسن تدعيلي

للخدامه توفّقت من هايه
وانه للخدمه ارفعتها الرايه
……….

غايتي حسين الحبيب الغالي
يرضه عني وكل وكت يبرالي
ما اعوفن خدمته للتالي
يعلم بگلبي وضميري وحالي

مفضّل علية الحبيب هوايه
وانه للخدمه ارفعتها الرايه

سيد زيد الفحام

سيد زيد الفحام, [٢٢.٠٧.٢١ ١٦:٤٢]
ميمر للخدمه 2021

تحزّم لبواليمه حسين وترك اثر بالخدمه
……….

بالك تضيع الفرصه يالبعدك شاب
اخذ الدرس وتعلّم امن الشيّاب
افنوا عمرهم بالخدامه الاطياب

ذوب ابمحبتك لحسين وكل وكت اگصد يمه
…………..

ايّام هاي الخدمه اعظم ايّام
مادام شاب اتعب وشدلهه احزام
گبل المشيب وكبرتك والآلام

تتحسّر عليها هواي من تصبح بلا هِمّه
……………

لا تنغر بدنياك فتره وتنساك
الزم طريق الخدمه وخدم مولاك
ميعوفك بكل الشدايد ويّاك

تمسّك ببواليمه حسين. لا تحزن ولا تعمه
……………..

فتره شبابك للحُسين اهديها
بين المواكب والعزه افنيها
وشكبر اجرك فاطمه تواسيها

كل گطره من دمعك نور بالگبر تضوي الظُلمه
……………….

يا شاب اقره الموعضه وافهم زين
خل غايتك بالخدمه مكسب للدين
مو بس اسم ردناك خادم لحسين

باخلاقه تتخلّق كون حسين وتسير برسمه
………………

لا تعتقد غير الحُسين يفيدك
خادم حُسيني بلا رياء انريدك
راية الخدمه خلّ ترفرف بيدك

كلما يمر بيك العوز لحسين روح وكلّمه
………………

يرتاح گلبك من تطب الحضره
من تلزم الشباچ احچي بعبره
اقسم عليه بمّه الحبيبه الزهره
يفزعلك حسين بساع من يسمع بطاري امّه

سيد زيد الفحام

سيد زيد الفحام, [٢٢.٠٧.٢١ ١٧:٠٧]
اخواني خدام الحسين عليه السلام بالنسبه للالحان توضيحية مو شرط نفس اللحن تقره القصيده اي لحن يعجبك اقراها
نسألكم الدعاء لي ولوالدية بالرحمة والمغفرة

سيد زيد الفحام, [٢٢.٠٧.٢١ ٢١:٣٥]
القصائد الولائية

سيد زيد الفحام, [٢٢.٠٧.٢١ ٢١:٣٥]
ولائية للحسين عليه السلام 2021

ما عندي غيرك يحسين
انت الگلب وانت العين / وانه الصرت مجنونك
تقبلني خادم ياريت
وعذرني لوما وفيت / ما اسوه شي من دونك
غالي وتظل غالي يالتعلم بحالي
………………….

من عالم الذر سيدي
واليتك وبيك اقتدي / ماعفتك بيوم
حبك رضعته امن المهد
وتوزّع بكل الجسد. / وبگلبي مختوم
صرت وربيت بنعمتك
نذروني اهلي لخدمتك / يالغالي للدوم
هذا الگلب بسمك يدگ
يااشرف واجمل عشگ / بعيوني مرسوم

شكراً جزيلاً مولاي
عينك علية منصباي / طول العمر ترعاني
منك شفت كل الخير
لا ما ادگ باب الغير. / ماعندي غيرك ثاني
اشكيلك احوالي يالتعلم بحالي
………………..

عنواني كتبه بدفترك
من زغري خادم منبرك / مولاي يحسين
جنّة حياتي بمجلسك
كل لحظه بيها اتحسّسك./ وي دمعة العين
اسمك عله شفافي انزرع
انسه ويذكّرني الدمع / يالغالي كل حين
يالصدرك بخيل انهشم
ونصاب گلبك بالسهم / مجروح ثلثين

ما انسه جرحك هيهات
تشهد علية الدمعات. / عاش الجرح بعيوني
وي منبرك عايش دوم
ما عفته يالغالي بيوم / ابچي واون يلگوني
ما انسه للتالي يالتعلم بحالي
……………………

يحسين يبن المصطفه
منك تعلمت الوفه / للباري وفيت
لمن شفت دينه انهتك
بدمك نصرته وثورتك / بالغالي ضحيت
وانه بخطاك اتمسّكت
بدنياي غيرك ماشفت / بحبك تكفّيت
ياسيدي وبيك التزم
وفقني وي باقي الخَدم / يمّك تعنّيت

لوما محبتك وياي
ماعيش لحظه بدنياي / اتعنّه ليك بدمعي
ادخل ضريحك ورتاح
من گلبي كل هم ينزاح / لو يم ضريحك ادعي
مافارگت بالي. يالتعلم بحالي
……………….

ميهمني كلمن ماقبل
والمارضه وراح وزعل / بس انت ارضيك
بس بكلامك مقتنع
يحسين عن كلشي انقطع / لمّن اناغيك
لاموني عدواني وصحت
بحسين ابوالاكبر همت / وشرح مآسيك
بيك ابتدي وبيك انتهي
يحسين ياثالث وصي / علمني اوافيك

احسب وعِدّ لعاشور
آنه لخدمتك منذور / بسمك وقف ايامي
خادم صرت للخدام
عاشر محرم كل عام / بالقامه اطبر هامي
والدمعه مرسالي يالتعلم بحالي
……………….

حرموك من ماي النهر
چبدك تفتّت ونفطر / من جمرة ضماك
فوگ الضمه نصاب بسهم
چبدك يبواليمه انثلم / من قسوة عداك
ياويلي من ظهرك طلع
سهم النواصب ما رجع / يالغالي اذّاك
لمن وگع حيلك طحت
عطشان ياعالم صحت / ما واحد انطاك

حَدّ الشمر سيفه وجاك
ياسيدي ومن مگفاك. / ضامي ويحزّ بنحرك
كلما شفت جاري الماي
اتــذكّــــــرك آنه بهاي / ابچي واهيم بصبرك
سامحني يالوالي يالتعلم بحالي

سيدزيدالفحام

سيد زيد الفحام, [٢٢.٠٧.٢١ ٢٢:٢٢]
قصيدة ولائية بين الحسين ع والخادم 2021

عشك گلبي المجروح. فقط بسمك مسموح
فداك الدم والروح. سيدي
عهد يحسين وياك اظل للموت انعاك
اموت بلا ذكراك. سيدي
من خيرك عايش تعطف دوم عليه
ماعوفـك لا وعيــــونـك تعـلم بيه
………………………………….

خدمتك عن عقيده
عطف گلبك اريده ظلمه من دونك حياتي
شرف لو من عبيدك
حُسين وكلشي بيدك حبك الطاهر نجاتي
أنه الخادم وجيتك
المجالس هيه بيتك. هيه اعز كل ذكرياتي
احس بيها رتياحي
دمع عيني ونياحي. ما افارگها لوفاتي

يطايح تحت الخيل. عليك دموعي تسيل
مصابك هدّ الحيل. سيدي
قليله دموع العين لون اكسر ضلعين
ابد ما اوفي الدين. سيدي
روحي بجمرات خيامك هم مچويه
ماعوفك لا وعيونك تعلم بيه
…………………………………..

ابــد لا مو بديّه
محبتك فطره بيّه بعالم الذر آنه عبدك
عشگتك بالبدايه
وتبـعـك للنهـــايه وشتريته بروحي ودّك
يقــرآن الهـــدايه
احبّــك عن درايه. جسمي عندي وروحي عندك
حُسين وصوتي عالي
يغالي وتبقه غالي ياهو عن گلبي يبعدك

يسألوني العذّال. بحبيبك شنهو الحال
وگلهم راحة بال. سيدي
يعايش روح بذات. محبتك هاك وهات
اعوفك لا هيهات. سيدي
عاهدت الزهره بحبك تعرف هيه
ماعوفك لا وعيونك تعلم بيه
………………………………….

ربيت عله الخدامه
درب مابي ندامه. ايدي يحسين بأديكم
حچو اهل الملامه
صحت گلبي وهيامه ما تغيّروني بحچيكم
مثل عابس جنوني
ابــد ما تبعــدوني والحقد خل يبقه بيكم
لبواليمّه انتمائي
حُسيني كربلائي. بوعيي امشي مو وعيكم

ولائي لأهل البيت ببوالأكبر جنّيت
اظل خادم ناديت سيدي
رغم انف العدوان. أنه بحبك ولهان
النكر فضلك خسران. سيدي
دوم اعلن صرخة حبي ومامخفيه
ماعوفك لا وعيونك تعلم بيه
………………………………….

أنه بحبك اجاهر
عشگ گلبي الشعائر ما اعيش بلا مجالس
يظل صوت المنابر
درس يحيي الضماير. ما تسد درسه المدارس
لذلك ما اعوفك
يبوالأكبر وشوفك. بالعشك علمني عابس
أنه الماعندي غيرك
عشت عمري عله خيرك. انت المسوّيلي واهس

تسر گلب الوالاك. رحيم عله الأذّاك
مثل طه ابمعناك. سيدي
كرم چفك معروف. ابد مترد ملهوف
بامانك انسه الخوف. سيدي
اقسم بالحضنت راسك والمسبيه
ماعوفك لا وعيونك تعلم بيه
………………………………….

محرم من يجيني
الك يشتد حنيني وشعر بنار المصيبه
اطب للمجلس ابچي
أون وبحالك احچي وحالة الظلت غريبه
عكب عباس اخوها
صدك زينب خذوها عالهزل راحت عجيبه
وسمعه الناعي ينعه
على الناگه تودعه. صاحب الجثّه السليبه

يون گلبي المفجوع صدك راسك مگطوع
برمح شامت مرفوع. سيدي
ابد ما انسه الصار. بكائي ليل نهار
لَجيّة راعي الثار. سيدي
اقرب واحد بالدنيا شخصك ليه
ماعوفك لا وعيونك تعلم بيه

سيدزيدالفحام

سيد زيد الفحام, [٢٢.٠٧.٢١ ٢٢:٢٤]
نزله ولائية 2021
جنوني وهيامي. يناس لأمامي
اصيح بولائي. حُسيناه
………………

بعالم الذر وهمت/بالحُسين اتعلّقت/اشكر الله هوايه
من صرت اول هله/ امي نذرتني اله/علمتني اقرايه
شدّت بچفي علَگ/من ابواليمه عشگ/بي اهيم الغايه
اسمي صار امن الزغر/خادم حسين افتخر/روحي صارت هايه

خدمته بحياتي وعشگه لوفاتي
صلاتي وندائي حُسيناه
……………….

اسمي خادم للخدم/بالمجالس ملتزم/من زغر اهواها
لبوالأكبر منتمي/لازم ايده ومحتمي/بدنيتي وبلواها
منبر حسين السند/ملتزم بي للأبد/نعمه ما انساها
عشگي لحسين شكثر/ يسوه كل هذا العمر/خلقتي ومعناها

حُسيني الهويه. اواسي الزچيه
مسار انتمائي. حُسيناه
…………….

حسين منهاج القيم/ابقه عاشگ هالأسم/مايعوفه الساني
عايش بگلبي نبض/اعتبر حبّه فرض/ساكن بوجداني
خدمة حسين الشرف/ولّزم دربه عرف/ما يتابع ثاني
منهج الله منهجه/والتمسّك بي نجه/التزم خلّاني

يعشگ البدايه يظل للنهايه
يدمعة عزائي. حُسيناه
……………..

عيوني لمصابه بچن/والچفوف اتعلّمن/الطم عله مصابه
لو عصر گلبي الدهر/اعتنيله عله الاثر / ما ادگ بس بابه
زيارته تمحي الذنب/زاير حسين انحسب/يعني من احبابه
لو وصلت لكربله/ماتظل كل معضله/اسجد عله عتابه

احسّ بحضوره. وهيم بعطوره
وصيح برجائي. حُسيناه
……………….

زاير بدربه اجي/للملك روحي مشي/كل سنه مشايه
خلّه ياخذني التعب/اتعب بدربه احب/خطوه خطوه ويايه
عاشگ وگلبي يرف/جدمي يسرع مايخف/من اشيل الرايه
شما يتعّبني الدرب/اوصل ودمعي يصب/اقره بسمه الايه

اطبّ بضريحه. اشم احله ريحه
اسمعه بكائي. حُسيناه

سيد زيد الفحام

سيد زيد الفحام, [٢٢.٠٧.٢١ ٢٢:٢٨]
مقدمه للعليله ع 2021

يا گلبي راح الغالي. ظلت خليّة داره
حال اليتيمه حالي. عكب الاهل محتاره
……….

سافر ابويه بعيلته / خلّاني وحدي بديرته / طفله وعليله
وفراگ ابويه شگد صعب/ مثل السهم صاب الگلب / فگد العقيله
اتمنّه يلفيني الأجل / طفله وعليله بلا اهل / دمعي اسيله
لا عم بقه ولاظل ابو / لا اخت يمّي ولا اخو / ياهو اشتكيله

راح اللذي يبرالي وتعـــذّر باسفـــاره
حال اليتيمه حالي. عكب الاهل محتاره
……….

بالدار احن وحدي وأون/ سهرانه وي دمع الحزن/ عيني عله بابي
كلما يفك بابي الهوى / اركض أنه ودمعي سوه / غرّگ ثيابي
كل ظني اهلي من السفر/ رجعولي ونزاح الخطر/ حسبو حسابي
فكّيت بابي وماشفت/ لا اهلي لا طارش خفت/ يكثر عذابي

وحسين شاغل بالي. وبگلبي تسعر ناره
حال اليتيمه حالي. عكب الاهل محتاره
……….
مشتاگه لحسين شكثر/ متعوده اشوفه كل فجر/ وغفه عله ايده
ياما گلتـــلـه ما اظل / ويّـاك اخـذنـي وماقبل / واليوم اريده
ماخذ خواتي وكل هلي/طفله وبعــــد ماظل الي/ بداره وحيده
اتـذكّــر ايـامي المضت / اختـي رقيه السـافـرت/ وذكر حميده

مشتاگه اشوف الوالي. تشفي الجرح انواره
حال اليتيمه حالي. عكب الاهل محتاره
……….

ليايوم اظل بس انتظر/لا حيل ظل ولاصبر/وجروحي كلفه
فراگ الابو ما ينحمل/مثل المرض وكثر يسل/دوخني وصفه
عندي ابو كلش ترف/متروس حنّية وعطف/عيّشني عطفه
سافر وطالت سفرته/ياخوفي تغدر دنيته/ بجروح طفّه

اگضي العمر للتالي. متيتّمه ومنهاره
حال اليتيمه حالي. عكب الاهل محتاره
……….

لحسين ابويه بكل وكت/ادعيله بدموعي چنت/تسهيل امره
لن اسمــع النـاعـي اجه / بصرخات ما بيها رجه / بعيونه عبره
حسين انذبح ناده وصحت/ويلاه يابويه وطحت/يتّمني هَجره
راسه الشريف عله الرمح/جسمه بألف طعنه وجرح/مگطوع نحره

ريت الأجل يدنالي. ولا استمع اخباره
حال اليتيمه حالي. عكب الاهل محتاره

سيد زيد الفحام

سيد زيد الفحام, [٢٢.٠٧.٢١ ٢٢:٢٩]
رئيسية للعليله ع 2021

عفتني بوحشة الدار. عليله وگلبي محتار
متت ماتدري بيه. ولاتسئل عليه
عليله وگلبي محتار.
……….

تحس كل طفله بالضيم اذا تفگد ابوها
حنان وعاطفه تريد صعوبه يعوّضوها
تظل للحسره والآه يتيمه يصبّروها
أنه بهالحاله حسيت عليله وماخذوها
بقيت بدمعة العين. احن وشتاگ لحسين
ابويه الماخذاني. گلت يمكن نساني
انوحن ليل ونهار. عليله وگلبي محتار
…………..

مريضه وّجهك اداوي چنت يوميه يمي
عفتني بهمي يحسين بعدمن يجلي همي
يباريني الدمع صار يبويه وزاد هضمي
عليله وسلني الفراگ يبويه وبان عظمي
بعد انشدمن عليك تعال بطيف الاگيك
اشوفنّك يغالي يبويه وشكي حالي
الي مارجعت خبار. عليله وگلبي محتار
……………

گمت كل ساعه اشتاگ خصوص المغربيه
تجيني بهالوكت دوم چنت تسأل عليه
تزيل آلامي يحسين تحط ايدك بديه
بقت بس ذكرياتك تعيش جروح بيه
بغيابك بس الجراح حلم عمري خفه وراح
احاچيك بكلامي. اوجهلك سلامي
يبويه شتنفع عذار. عليله وگلبي محتار
…………..

عليله وطفله وجروح يبويه ودنيا ضدي
بعد شلّي بحياتي ولا ظل غالي عندي
خذت كلّ هلي يحسين اون بالدار وحدي
يبويه مساهره الليل وهل دمع عله خدي
قريت الفاتِحه هواي. گمت اتحلّمك جاي
تدگ بابي وتجيني. الك فايض حنيني
صدگ وحچيلك الصار. عليله وگلبي محتار
………….

عفتني بجمرة جفاك اعد وحسب ليالي
زرعت بدربك ورود لجل عينك يغالي
غيابك طوّل هواي تعال وشوف حالي
رجف گلبي وخفت حيل عليك وشاب بالي
شعرت بجمرة مصاب. طلع من گلبي عطّاب
اشم ريحة منيه. ذكرت الغاضريه
صحت يارب يستّار. عليله وگلبي محتار
………….

سمعت الناعي ينعاك وگع گلبي ولزمته
يصيح حسين ذبحوه على التربان عفته
صحت يابويه ويلاه حصل هذا العرفته
عشر مرات يحسين الك وجهي لطمته
سألته وگال ياويل ابوچ انداس بالخيل
اشد من هالرزيه خذوا زينب سبيه
غريبه بولية اشرار. عليله وگلبي محتار

سيد زيد الفحام

سيد زيد الفحام, [٢٢.٠٧.٢١ ٢٢:٣٤]
نزله للعليله ع 2021

بجنحك يطير الصاف اخذ مرسالي
لحسين ابويه الأغله من كل غالي
………

گلّه العليله فاطمه تبچي عليك
يامن عفتها ليمته تبقى اتانيك
لوما مرضها اليكتل تعنّت ليك
عذبني دهري ومادريت بحالي
………

اسرع يطير الصاف اخذ دمعاتي
لحسين ابويه ولخوتي وعمّاتي
وخبرهم بحالي وعُظم مأساتي
موش المرض جرح الهجر چتّالي
……….

حط عله متن حسين ابويه وگلّه
فرگاك كاتل فاطمه مو عِلّه
ما خَلّه فگدك كل امل ما خَلّه
يالسافرت منهو البعد يبرالي
………..

يايوم يرجع ياوكت نتلاگه
ياطير لحسين شكثر مشتاگه
ياريت ميته وماعشت بفراگه
وشلون اعيش ابّيت مظلم خالي
………….

سلملي ياطير عله ابوي الماعاد
من بعده لا ماي الهنالي ولازاد
عالباب اگعد ونشد الرايح راد
ياطيرابوي حسين شاغل بالي
…………

اگعد ابابه وانتظر ليل انهار
من كثر ما ابچي وأون ملني الجار
كل يوم اگولن جاي وفرشله الدار
ما يهده گلبي ولا عُمُر يهنالي
…………

لن ابن حذلم ينعه ردلي بعبره
يصرخ حسين الغالي گطعو نحره
عالرمح راسه وخيل داست صدره
هذا الخفت منه وتحقق تالي

سيد زيد الفحام

سيد زيد الفحام, [٢٢.٠٧.٢١ ٢٢:٥١]
قصائد ليلة ام البنين عليها السلام

سيد زيد الفحام, [٢٢.٠٧.٢١ ٢٢:٥٢]
مقدمه لأم البنين ع 2021

ام البنيــن اليـوم. گـالـت كلمتيـــن
الرايد يجازي رباي خل ينصر حسين
•••••••

گبل لا يطلع ظعن شبل الزجيه
يابنيني الاربعه عندي وصيه
بالحُسين وصيتي وخته الهاشميه
صيرو خدام الهم ليوم المنيه

رخصوله دم ورواح. من يغدر البين
الرايد يجازي رباي خل ينصر حسين
•••••••

يابوفاضل ابدي ويّاك بوصيتي
انت نور عيوني يبني وعمد بيتي
عَلّي عند الزهره ياعباس صيتي
خل تگلّي الزهره مشكوره وفيتي

لحسين اريدك عون ضحّيله چفين
الرايد يجازي رباي خل ينصر حسين
•••••••

علي رادك تخدم حسين وتنصره
يابوفاضل تچوته وحزام ظهره
صير ياعباس عبده وطيع امره
جيش امية بكربله بالسيف شطره

يوليدي ياعباس افنيها صوبين
الرايد يجازي رباي خل ينصر حسين
•••••••

وبعد اوصيك بوصية يبني عباس
يبني وي زينب اريدك ترفع الراس
طلعت وياك بكفاله وسمعت الناس
انت تتكفّلهه لازم يبوالنوماس

احجبها لا تنشاف عن نظرة العين
الرايد يجازي رباي خل ينصر حسين
•••••••

انت وولادي الثلاثه لا تقصرون
دون ابوالأكبر اريدنكم تضحّون
حسين ابوالسجاد غالي هواي تدرون
هامة امكم ترتفع لمن تطيحون

لو غاب ابوالسجاد يتعوّض منين
الرايد يجازي رباي خل ينصر حسين
•••••••

سمعاً وطاعه يئمنه بصوت صاحو
ودّعــوها وي ابوالسجاد راحو
نصروا حسين ومقام العالي لاحو
مضرّجين بدمهم عله الگاع طاحو

ضحّوا لبوالاطهار. ماعافوا الدين
الرايد يجازي رباي خل ينصر حسين

سيد زيد الفحام

سيد زيد الفحام, [٢٢.٠٧.٢١ ٢٢:٥٣]
رئيسية لأم البنين ع 2021

هجرك صعب يحسين. ياضوه عيوني
ناوي بسـفـرتـك ويـن. ياضوه عيوني
يكتل جرح فرگاك
خلّيني امشي وياك. ياضوه عيوني
………..

ام البنين وگلبي وج جمره ونار
ماغفت عيني ودمعي ينزف مدرار
مابيه اگوم وحيلي يحسين انهار.
لمن سمعت تريد تهجر هالدار

حاچيني وين تروح. ياضوه عيوني
فگدك حزن وجروح. ياضوه عيوني
لا تعـتـقـــد انسـاك
خلّيني امشي وياك. ياضوه عيوني
………..

ام البنين وكل وكت خادمتك
عفت البنين الاربعه وماعفتك
انت البقيت وعايشين ابّختك
بالزهره امك فاطمه حلّفتك

لا ترحل بهاليوم ياضوه عيوني
هذا السفر مشؤم. ياضوه عيوني
غداره تدري اعداك
خلّيني امشي وياك. ياضوه عيوني
………..

معوّدني كل مصباح عيني تشوفك
ياسيدي ما ينحصي معروفك
رايد تروح شلون روحي تعوفك
صبح ومسه يبن الزجية انطوفك

رف گلبي خاف عليك. ياضوه عيوني
هالدنيا تغـــــــدر بيك ياضوه عيوني
لا ترحل اترجّاك
خلّيني امشي وياك. ياضوه عيوني
………..

فدوه البنين الاربعه خل يفدوك
طول السفر يبن الزجية يخدموك
اتبرّه منهم والله لوما يحموك
وصّيتهم بالغاضريه ينصروك

ربّيت الك اولاد. ياضوه عيوني
تنصرك يبوالسجاد. ياضوه عيوني
اذّاني جرح جفاك
خلّيني امشي وياك. ياضوه عيوني
………..

محروس بالله يبني يانور العين
يايوم ترجع من سفرتك يحسين
وين انطي وجهي بغيبتك ورحل وين
ياروحي خوفي عليك من غدر البين

يبني ويتاج الراس. ياضوه عيوني
سلّمتك العباس ياضوه عيوني
يوم الشدد يفداك
خلّيني امشي وياك. ياضوه عيوني
………..

ما ادخل لدارك ابّابك ظليت
احسبلك الأيام لكن ما جيت
كل اگول اليوم ترجع للبيت
يايوم اشوفك يالعفتني اشتاگيت

ادعي بصلاتي تعود. ياضوه عيوني
دربك زرعته ورود. ياضوه عيوني
رب العرش يرعاك
خلّيني امشي وياك. ياضوه عيوني
………..

مارد خبر منك ولارد مرسال
ما ادري انت بياوطن وبياحال
لن صوت ابن حذلم فجع گلبي وگال
حسين انذبح راسه برمح عالي انشال

لا ظل فكر لا راي. ياضوه عيوني
حيل الطمت عيناي ياضوه عيوني
جرح العطش اذّاك
خلّيني امشي وياك. ياضوه عيوني

سيدزيدالفحام

سيد زيد الفحام, [٢٢.٠٧.٢١ ٢٢:٥٥]
نزله لأم البنين ع 2021

تنگطع چفينك. في سبيل حسينك
يابوفاضل يابوفاضل
………….

آنه امك يابوفاضل ارد اوصّيك
ادري متقصّر يغالي وفتخر بيك
لا تعوف حسين لحظه الله يجزيك
انطي چفينك ونصره هيبه ينطيك

عالنهر تلگيني لو طحت ترضيني
يابوفاضل يابوفاضل
………….

انت انت حزام ظهره ساعة الموت
يبني طر الجيش گبله للحرب فوت
لو سمعت امن المخيّم فرزن الصوت
زينب اختك من تندبك اهجم بيوت

رايتك عَلّيها وآل اميه افنيها
يابوفاضل يابوفاضل
………….

لا يمس حسين سوء وانت ويّاه
جيش اميه ظهره كسره وحمل لواه
والشمر دوس عله راسه لو تدنّاه
لحد ما توگع چفوفك اسحگ عداه

انزللهم حيدر رد عليهم خيبر
يابوفاضل يابوفاضل
………….

خلها تتناثر امامه روس وچفوف
اشفي صدر حسين منهم ونشر الخوف
تحتك الفرسان خلها تزحف زحوف
يُمّه ياعباس طشّر كل الاصفوف

من تطب ميدانك ترتجف عدوانك
يابوفاضل يابوفاضل
………….

آل امية بكربله لو منعو الماي
معضله وبس انت الهه ها يوفّاي
ضهضب عليهم ييُمّه ساعتك هاي
والنهر للخيم جيبه وصير روّاي

اروي كل العيله والوگع تچّيله
يابوفاضل يابوفاضل
………….

گلهه عد عينچ ييُمّه لا توصّين
الله خالقني ييُمّه لخاطر حسين
افدي روحي دون اخوي وانطي چفين
عالشريعه هناك وعدي والوعد دين

عفيه ياعباسي انت رفعة راسي
يابوفاضل يابوفاضل

سيدزيدالفحام

سيد زيد الفحام, [٢٢.٠٧.٢١ ٢٣:١٧]
قصائد ليلة مسلم بن عقيل عليه السلام

سيد زيد الفحام, [٢٢.٠٧.٢١ ٢٣:١٨]
مقدمه لمسلم عليه السلام 2021

ما اگدر بدونك. چا يمته نتلاگه
يابويه وعيونك. ارجعلي مشتاگه
……….

ما عوّدتني عله الهجر ليش اهجرتني
من زغري چنت مدلله ما فارگتني
ما ادري بويه ليابلد رحت وعفتني
حال اليتيمه بلا أبو ريتك شفتني

والطفله يهضمها والدها بفراگه
يابويه وعيونك. ارجعلي مشتاگه
…………

ما چنت احس طعم اليتم عشت بحنانك
دنيايه احلى امن العسل والله بزمانك
يجرحني هسّه بكل وكت خالي مكانك
بيتك يبويه بلا ضوه بعازت امانك

بلساني حسّيته طعم اليتم ضاگه
يابويه وعيونك. ارجعلي مشتاگه
……….

هنيال كل طفله غفت بحضان ابوها
تغفه عله ايده وتنسعد لو ناشدوها
بس اني هاي الأُمنية مني خذوها
حالي مثل حال العمت واليتّموها

بويه اليتم قاسي خانگني بطواگه
يابويه وعيونك. ارجعلي مشتاگه
……….

طفله وعفتني بياوضع ماتدري بيه
انشد عليك ابدمعتي صبح ومسيه
عيني عله دربك ونتظر كل مغربيه
يارب عكب هذا السفر ترجع عليه

ما حققّت حلمي. مني الدهر باگه
يابويه وعيونك. ارجعلي مشتاگه
……….

ياوالــدي گلبـي انلچم بنتك حميده
وي عمي سافرت ورحت ايدي عله ايده
نتنطّر اخبارك سوه الصارت بعيده
ياعمي گتله بدمعتي مسلم اريده

يمسح على راسي ودموعه حرّاگه
يابويه وعيونك. ارجعلي مشتاگه
……….
گلّي حميــده ادلّلي ياقُـرة العين
آني ابمكانة والدچ دم ضحّه للدين
يمسح على راسي وبچه بمصابك حسين
حس گلبي يابويه وصحت اوصلّك منين

من ونّتي ودمعي. تتعثّر الناگه
يابويه وعيونك. ارجعلي مشتاگه
……….

گالولي من سطح القصر يالغالي دفعوك
اهل الغدر وهل المكر بالكوفه قتلوك
يابويه مسلم بالحبل ياويلي سحبوك
راسك على راس الرمح للباغي يهدوك

مصابك هضم روحي وجروحي خَنّاگه
يابويه وعيونك. ارجعلي مشتاگه

سيدزيدالفحام

سيد زيد الفحام, [٢٢.٠٧.٢١ ٢٣:١٩]
رئيسية لمسلم عليه السلام 2021

ليش الضيف عدكم ما تضيفونه
ليش الرايـد يعـزكم تغـدرونه
اطباع العرب وين
لا ذمّه ولا دين
ليش الرايـد يعـزكم تغـدرونه
……….

يهل الكوفه سمعوني
مسلم آنه طيعوني مبعوث الامامه
ارسلني ابواليمّه
الكم احكم بأسمه. ونطيكم علامه
ذنّي رايته وختمه
دخلو بطاعته وحكمه. قادم بالسلامه
يهل الكوفه فزعوله
اقدم ألنه گلتوله. ننطيك الزعامه

آلاف الكتب وصلتله من عدكم
لَبّه الدعوه قادم بالأهل الكم
لتصيرو شياطين
لا ذمّه ولا دين
ليش الرايـد يعـزكم تغـدرونه
……….

ياهو الأحق بالطاعه
حسين وحزبه وشياعه. ريحانة مُحَمَّد
لو ابن البغي الحاكم
كافر فاجر وظالم بغيه وظلمه يشهد
يزيد اتسلّط عليكم
لتخلّونه يغـويـكم. مشرك بالله مرتد
حسين اليهدي للجنّه
منقذ الكم اتعنّه. مثل الهادي ينعد

مسلم آنه ابن عمّه وحاچيكم
ابن الزهره هذا المعتني ليكم
عوفو العنده وجهين
لا ذمّه ولا دين
ليش الرايـد يعـزكم تغـدرونه
……….

ما تنظف ضمايركم
معميّة بصائركم. يصحاب الضلاله
بيعتكم نقضتوها
والعتره تركتوها. اشرف كل سُلاله
مو انتم دعيتونه
ليش بسرعه عفتونه. خنتوها الرساله
معروف الغدر بيكم
بايعتوا اعاديكم. ضد الهادي وآله
ضيف عليكم وّاجب تكرموني
بليله ويوم يهل الكوفه خنتوني
للظالم موالين
لا ذمّه ولا دين
ليش الرايـد يعـزكم تغـدرونه
………..

صاحوا لا تحاججنه
يامسلم توافَقَنه. ننصر آل اميه
احنه نقاتلك جينه
لو تخضع لوالينه قرر هالمسيه
سلّم نفسك وساوم
وحدك تعجز تقاوم. فكّر بالقضيه
مسلم آني ما اقبل
هيهات اخضع وانذل. ما اخشه المنيه

ألّا بسيفي اذلكم ما اطخ راسي
ما بايع يزيد لآخر انفاسي
ماطيع المضلّين
لا ذمّه ولا دين
ليش الرايـد يعـزكم تغـدرونه
…………..

الضيف بياعرب يُقتل
عار عليكم اتسجّل. شوّهتو الضيافه
عفتوني بلا ناصر
بايعتو يد الكافر. غاصب للخلافه
بس هانئ وفه لدينه
شيعي وضحّه بسنينه لضيفه بروحه وافه
ما استسلم واخضع
ابن زياد خل يسمع. حكمك ما اخافه

بس لحسين ابايع ما خنت عهدي
كلّا يا يزيد بكل وقت رَدّي
اعرفكم مُعادين
لا ذمّه ولا دين
ليش الرايـد يعـزكم تغـدرونه
…………..

مسلم بس لبوالأكبر
باقي لگطعة المنحر. ما اترك ولائه
حسين وماطعت ثاني
نازل للحرب آني. راح ارفع لوائه
وارث من علي عمي
ديني وقوّتي وعزمي. صولاته وندائه
فدوه دمومي وجروحي
لحسين الملك روحي. استشهد فدائه

بايعت الحُسين وامره لبّيته
آنه اوّل شهيد بروحي واسيته
ما بيكم مضحّين
لا ذمّه ولا دين
ليش الرايـد يعـزكم تغـدرونه

سيدزيدالفحام

____________________________&

سيد زيد الفحام, [٢٢.٠٧.٢١ ٢٣:٢٠]
نزلة لمسلم عليه السلام 2021

هيبة بني هاشم
وبيمنته الصارم
بالكوفه دگ ثايه
بالكوفه دگ ثايه
…………….

شايل وصف حيدر عن مسلم اتكلّم
حيد واسد غاضب بالحومه ما يهتم
سل سيفه بيمينه للمعركه اتحزّم
وحده وسبه الكوفه. خلّاها تنزف دم

مسلم تحدّاهم
وبسيفه ذلًاهم
ما يخلف حچايه
بالكوفه دگ ثايه
…………….

ماعنده اي ناصر بس طوعه شيعيّه
بالمعركه تشجعه عند الله مرضيّه
وتگلّه يا مسـلم. سوّيها ثوريّه
گلوب الزلم منك. خلّيها مچويّه

حملة علي احملهه
والكوفه زلزِلهه
يالساعتك هايه
بالكوفه دگ ثايه
…………….

ياطوعه گاللهه عد عينچ وشوفي
افنيهم بسيفي. وبصولتي وخوفي
راية علي وطه شايلهه بچفوفي
ما يوگف بوجهي لا شامي لا كوفي

صولاتـي تكــرّر
صولة علي بخيبر
ما توگع الرايه
بالكوفه دگ ثايه
…………….

عجزت بني ميّه من مسلم وسيفه
سلّمله عزرائيل. شغله وصبح ضيفه
روس الزلم طارت يتحكّم بكيفه
مسلم وفه بوعده ومنهم اخذ حيفه

محّد گرب يمّه
حيد بالف زلمه
مشّاهم برايه
بالكوفه دگ ثايه
…………….

لوما غدر بيهم اي والله يفنيهم
خيل وزلم توگع. من يهجم عليهم
من موقعه ابن زياد. يسمع بواچيهم
لو رادو يشردون مسلم يلاگيهم

كلمن وصل حدّه
راس وجسد ردّه
يهزمهم الغايه
بالكوفه دگ ثايه
…………….

حفروله حفره وطاح عجزو يطيحونه
سيوف ونبل ورماح گامو يضربونه
تاليهه لبن زياد مسلم يودّونه
والطاغية الملعون گلهم يقتلونه

مسلم وفه حسينه
وستشـهــد لدينه
تشهد اله الآيه
بالكوفه دگ ثايه

سيدزيدالفحام

سيد زيد الفحام, [٢٣.٠٧.٢١ ١١:٥٩]
قصائد ليلة الأنصار عليهم السلام

سيد زيد الفحام, [٢٣.٠٧.٢١ ١١:٥٩]
مقدمه للانصار 2021

صرخة نرفعــــها على مر السنين
نحيه ونموت عله حبك ياحُسين
……….

سيدي يحسين ياروح الزجية
احنه انصارك ولا نخشه المنية
خلها تسمعنه النواصب آل امية
احنه بايعنـــــاك بيعه الحيدرية

ما نبـايـع للعُتـــــــــاة الظالميـــن
نحيه ونموت عله حبك ياحُسين
……….

انت بس قائدنه غيرك ما نطيعه
سيدي يحسين حبك ما نبيعه
احنه انصارك وانصار الشريعه
انولدنه وعشنه ونموت احنه شيعه

ماكو غيرك بالأرض صادق امين
نحيه ونموت عله حبك ياحُسين
……….

واحد وسبعينك انصار الامامه
يا حلات الموت ويّاك بكرامه
ما نبايع لا يزيد ولا نظامه
السلامه بلا وجودك مو سلامه

وين نلگه مثلك بهالدنيه وين
نحيه ونموت عله حبك ياحُسين
……….

كربله ارض المواقف والشهاده
وحنه اصحاب المواقف والاراده
ما نعوفك نصرتك اعظم عباده
ياحُسين وبس الك تحله السياده

دونك انقاتل لحد گطع الوتين
نحيه ونموت عله حبك ياحُسين
……….

آنه عد عينك حبيب ابن مظاهر
افتديك بمهجتي ودم المناحر
جيتك امن الكوفه يامولاي ناصر
جيتك انصرك بالفعل مو بالمظاهر

جيت اخضّب شيبي من دم الجبين
نحيه ونموت عله حبك ياحُسين
……….
صاحو الانصار كلهم احنه نفداك
عفنه دنيـانه واهلنه وتّبعنـــاك
عابس وجون وزهير واسلم وياك
واحد وسبعين ناصر احنه جيناك

ما يهمنه الموت احنه العاشقين
نحيه ونموت عله حبك ياحُسين

سيدزيدالفحام

سيد زيد الفحام, [٢٣.٠٧.٢١ ١٢:٠٠]
رئيسية للانصار 2021

دنيا وآخـره ويّـاك انصـارك يبوالأكبـر
ما نتخلّه عاهدناك شيعه لگطعة المنحر
ما ننذل
ما نقبل
قائد غيرك يكون
……….

يالغالي / لتبالي / بكثرة آل امية واحنه موجودين
نهزمهم / ونذلهم / انصارك نشامه الواحد وسبعين
تحضّرنه / أئمرنه / وشوف بعينك اليجرالهم يحسين
نغزيها / نفنيها / جيوش يزيد كلها ونهزم الصوبين

عاين صولة الاصحاب تنقاس بحجر سجّيل
سيوف البالحرب تنهاب تذبح بالزلم والخيل
والعسكر
يطشّر
عدوانك يموتون
…………………

بموقفنه / تعرفنه / مو احنه النبايع ليلة ونخونك
سُمعتنه / وصحبتنه / لحدّ الموت ما نتبرّه وعيونك
توحّدنه / تعاهدنه / ما دام احنه يمك ما يمسّونك
لو اكثر / نتوذّر / ميهم واليهمنه ما يأذّونك
محّد يگدر يأذيك ما دام النفس بينه
ارواح ودمه نفديك منعوفك يوالينه
ما نخضع
ما نركع
خلّيهم يسمعون
…………………

وفّايه / ويّايه / آنه حسين اعلم بيكم انصاري
حيّاكم / بدماكم/ حبّي وديني يسري وعزمي وصراري
بالماضي / والآتي / ما تحصل مثلكم صحبه بخباري
وفّيتوا / كفّيتوا / مسكنكم معاي بجنّتي وداري

حان الموعد المذكور. ساحة كربله هايه
ضحّوا للشريعه انحور. نرضي الخالق الغايه
هِمّتكم
فزعتكم
اعرفكم توافون
………………..

عن عينه / بجبينه / حبيب ابن مظاهر شدّ الاعصابه
لتمجيده / باس ايده / اخذ رخصة امامه حسين وترابه
للحومه / بعلومه / نزل ينصر امامه اكبر اصحابه
من دمّه / خط اسمه / حبيب وشيبته حنّاها بخضابه

ضحّه بدمّه لجل حسين شيخ انصاره ما قصّر
بحجره وغمّضاها العين. بسيوف العده توذّر
شم عطره
من صدره
ودّع نور الاعيون
…………………

لن عابس / بي واهس / عشّاگ الحُسين وماترك دربه
عن جسمه / شگ هدمه / بلا سيف ورمح لمن دخل حربه
شــهـدوله / وگـالــوله / يا عابس جنون بعقلك انحسبه
تحداهم / ناداهم / جنّني الحسين بعشگه وبحبّه

هـذا العاشگ الولهان قدّم مهجته ودمه
بلا سيف اعتنه الميدان يفدي حسين ابواليمّه
مجنونه
خيّعونه
مثله وصار مجنون
…………………….

سيّدهم / قائدهم / كل باقي الصحابه استشهدو دونه
بحزانه / وشجانه / حسين عله الصحابه دمعت عيونه
عالغبره / متنثره / اجساد اليحبهم صرعه مطعونه
ضحّوله / وفّـوله / ضل وحده الحسين باهله وظعونه

يجرح مصرع الانصار. اهل الغيره والنخوه
نصروا والــد الاطهار وين الشيعي واليسوه
نذكرهم
نشكرهم
نعرف ما يقصرون

سيدزيدالفحام

سيد زيد الفحام, [٢٣.٠٧.٢١ ١٢:٠٢]
نزله للانصار 2021

راية الأنصـار رايه شيعية
صرخة الأيثار كـربـلائيــة
………..

صرخة اصحاب الحُسين بكل زمن نور
صرخه يتجدد صداها بيوم عاشور
صرخه ضد الباطل وكل ظلم مستور
صرخه كلّا يا يزيد العاش مخمور

كلمة الاحرار. كلمه صدگية
صرخة الأيثار كـربـلائيــــة
………..

واحد وسبعين ثائر نصروا حسين
لاگو تلاثين الف امن الشياطين
بكربله ضد آل امية العين بالعين
گالوا ارواح ومناحر فدوه للدين

طالبوا بالثار صحبه مرضيّة
صرخة الأيثار كـربـلائيـــــــة
………..

لن حبيب ابن مظاهر صاحهم صوت
يالله يصحاب الولاية نزلوا للموت
انقاتل اصحاب الضلاله تريد طاغوت
اليتبع حسين وينصره والله مبخوت

ننصر الاطهار. دنيا وقتية
صرخة الأيثار كـربـلائيــة
………..

عابس وجون وزهير وكل الانصار
قاتلَوا دون الحسين بهمّه وايثار
ذلّوا جيوش آل امية وخذو الثار
ستشهدوا نالوا كرامه الصحبه والجار

عالعهد ابرار. صدقت النيّة
صرخة الأيثار كـربـلائيــــة
………..

فتية الايمان اصحاب الولايه
آمنوا بحسين وزدادوا هدايه
حدّدوا من كربله خط البدايه
ضحّوا وعاشوا مبادئ للنهايه

بالزمن تذكار. ثورة قدسية
صرخة الأيثار كـربـلائيــة
………..

احنه لازم عالعهد نصدق مثلهم
مو فقط اقوال نتئسّه بفعلهم
نيّة الانصار سبقت كل عملهم
خل نصفّي النيّة ونسير بركبهم.

نخدم الزوار. نقره لطميّة
صرخة الأيثار كـربـلائيــة

سيدزيدالفحام

سيد زيد الفحام, [٢٣.٠٧.٢١ ١٥:٤٠]
قصائد ليلة العباس عليه السلام

سيد زيد الفحام, [٢٣.٠٧.٢١ ١٥:٤٠]
مقدمه للعباس عليه السلام 2021

ما شوف راية ولا كفيلي بعيني
عباس طاح بيا كتر دلّيني
يحسين لتظل ساكت وحاچيني. ياخويه
…………

ماشوف رايه عله النهر لاحامي خدري الغالي
خيل وزلم عالمشرعه خاف ورجف دلّالي
عباس ماشوفه بعد بس التراب اگبالي
طمّني يحسين شحصل عن كافلي اليبرالي

ليش انت لازم ظهرك وتتحسّر
شصاير على العباس يابوالأكبر
بجروح گلبي وهمّي لتخلّيني. ياخويه
…………..

يحسين حاچيني شسبب وجهك تغيّر لونه
بس لا چفوفه اتگطّعن بس لا سهم بعيونه
عباس اخويه الهاشمي قوة علي بمتونه
ما يوگع وما ينثني إلا اذه يغدرونه

معقوله يرمينه الشمر بسهامه
وعباس عايش مايكسر عظامه
ياخوفي طاح وطيحته تأذّيني. ياخويه
……………..

ما جاوب اخته امن الألم گلبه احترگ بالهيمه
لخيمة ابوالغيره دخل طيّح عمود الخيمه
معناها يازينب وگع عباس راعي الشيمه
يعني استعدّي للسبي ودرب المآسي وضيمه

لطمت وجهها زينب المفجوعه
راواها دم من يمنته المگطوعه
گاللهه يختي عله الصبر عينيني ياخويه
………………

شحچيلچ وخاف الحچي ما ظنّچ اتحملينه
ما واجهوه غدروه غدر ياريتچ تشوفينه
ظل حاير بظهر الفرس من گطّعوا چفينه
عباس طاح عله النهر صابه العمد بجبينه
عالمشرعه لمن وگع ناداني
حسّيت طايح منّي نصفي الثاني
ما شرب ماي وغايته يواسيني. ياخويه
………………..

متزاحم بصدره النبل ضيّع علينه الملگه
همّيت اشبگه وفكّرت تلچم جروحه الشبگه
ودّعته يختي بدمعتي وصّاني گبل الفرگه
من زينب اطلبلي العذر صاح وحچاها بحرگه

باجر اذا راحت سبي للكوفه
لا تنظر لجسم الگمر وچفوفه
منچ سماحه رايد موصيني ياخويه
……………

ما قصّرت يابالفضل ياخويه ومسامحتك
وفّيت ياحامي الظعن مشكور يابعد اختك
شماصار بية بالسبي لا تهتم وعاذرتك
تبقه الكفيل شماجره ارحل وعود ابختك

لكن ابواليمه انفجع بغيابك
ظهره انكسر يابالفضل بمصابك
حالك وحاله ابكربله امبچّيني

سيدزيدالفحام

المجموعة الثانية

سيد زيد الفحام, [٢٣.٠٧.٢١ ١٥:٤٢]
رئيسية للعباس عليه السلام 2021

يمّ النهر ظهري انكسر يابالفضل گوم
ما ظل اخو بصيواني
وتشمّتت عـــدواني يابالفضل گوم
………….

صرخة الفـاگـد اخـو / صعبـة گـــدام العــدو / كلها شمّات
هذا حالي البي صرت / ابچي لو اسكت حرت / جرحي موّات

يابوفاضل رد عليــــة وكسر عيون الزلم
گلّي ما ميّت بعـدني عايش وبيدي العلم
اعثر بجدمي اجيتك حيلي ياخويه انهدم
بدال راسك ريت راسي بالعمد خويه انهشم

ضاع الهوى وراح الضوه. بعدك يعباس
جرحك صعب اذّاني
وتشمّتت عـــدواني يابالفضل گوم
………….

صعبــه ياحامي الخـدر / يشـمت بحالي الشمـر / لا يعباس
من طحت كلشي اختلف / للطعن ظهري انكشف / فرحت الناس

آنه اخوك حسين خويه يالعفتني بلا اخو
منيلّي عباس ثاني بالشدد يوفي وكفو
آل امية استوحدوني وحدي مابين العدو
وسفه من بعدك السافل يذبح بنحر العلو

يابالفضل. بين النبل وجروح لسيوف
خويه الدهر خلّاني
وتشمّتت عـــدواني يابالفضل گوم
………….

بمصرعك ذاب الگلب / شفتك ودمعي يصب / بلايه چفين
راسك العـالـي انهشـم / خويه وبعينـك سهـم / جرّح العين

من شبگتك يابوفاضل چنّه رد بيك العمُر
ردت تشبگني وچفوفك گطعوهن يابدُر
ادري مگطوعات ادينك خويه لا تبدي العذُر
آنه اشمّك يابوفاضل آنه اضمّك للصدُر

جفنك غفه صوتك خفه. هذا اخر اوداع
يالموّتت ذرعـــاني
وتشمّتت عـــدواني يابالفضل گوم
………….

گـلّي ياراعـي العـلم / شلـون اروحن للخيم / وحدي ظليت
ظهري محني ومنفجع / يفضح جروحي الدمع / ياضوه البيت

بيش اجاوب زينب اختك من تشاهدني فرد
طاح ما أگــــدر أگلـهـه ، ليهه ما اگــدر اصد
زينـب وتنشـدنـي عنـك حگّه صوتي ينعگد
شلون أگلهه حامي خدرج يختي راح ومايرد

هذا الخبر. يترك اثر يجرحها كل يوم
بالدمعــه تتلگّـاني
وتشمّتت عـدواني يابالفضل گوم
………….

زينـب وكل الحـرم / امن الضمه شافو هضم / رادو الماي
سكينه عنك ناشدت / ترجعلهــــــه اتعـــوّدَت / ها يوفّاي

راح ارد مكسور ظهري راح اوگّع خيمتك
خالية ومابيها مايك راح ارجّع جربتك
بعد ما انشـرها ثاني راح الفلف رايتك
يعني ياعباس كلشي مات بينه بطيحتك

عفتك جرح. صابه الرمح ما يشفه هيهات
يالموقفك انساني
وتشمّتت عـدواني يابالفضل گوم
………….

عفتك عله المشرعه / والچفوف امگطّعه / تنزف دموم
امشي وعثر بالجدم / محني ظهري امن الألم / گلبي ملچوم

للخيم رديت اكابر واني مكسور الظهر
يابوفاضل ساعه بعدك ينگطع مني النحر
والحرم بعدك وبعدي يبقن بگاع الخطر
عالهزل باجر سبايا كل خواتك يا گمر

آل النبي بنوگ السبي يمشن سبيات
سيف المنية متاني
وتشمّتت عـدواني يابالفضل گوم

سيدزيدالفحام

سيد زيد الفحام, [٢٣.٠٧.٢١ ١٥:٤٢]
نزلة للعباس عليه السلام 2021

يبوفاضل. يبوفاضل
يبوفاضل. يبوفاضل
…………..

يبوالغيره عله بختك وفي وگدها وندبتك
دهد وترس جربتك. عطشنه وماكو حل

يبن حامي الحميه. يسبع الغاضريه
تهابك آل اميه. اذا سيفك نزل

يالله ياعباس زلزل كربله
وگلب الصوبين وروي العايله
سيفك القاطع يحل المعضله
…………….

سمع اخته وتحزّم. ركب مهره وتقدم
تفور الغيره بالدم. حمل عالمشرعه

يجيب الماي قرر مثل صولات حيدر
على العدوان من كر يعيد الواقعه

هذا اخو زينب نِعم منه وكفو
بذولفقار حسين شگ جيش العدو
اخو بالكلفات يانعم الاخو
…………………

نزل عباس بيهم عذاب وحل عليهم
زلم تسمع بچيهم. گطع روس الزلم

جثث تتطاير وروس. عليهم يمشي ويدوس
صرخ وختنگت انفوس. عليهم من هجم

عالنهر عباس ثبّت رايته
نزل منّ الماي يترس جربته
رجف ماي المشرعه من خزرته
……………

رجع والماي ويّاه شهم وحسين حيّاه
چبد عبدالله روّاه على اعناد العده

حرم وطفال من هاي. شهم سمّوه الروّاي
عطاشه شربوا الماي. وفاهم موعده

شربت الأطفال من مي جوِده
كافل العباس وفّه عهوده
عالنهر صولات اله مشهوده
………………

علي بكل الملاحم رفع شان الهواشم
كفل كل الفواطم. كفو يالهاشمي

بطل حامي الظعينه اخذ ثاره بيمينه
سحك روس الظغينه. بضفاف العلگمي

آل امية عجزو يطيّحونه
قرروا عالمشرعه يغدرونه
گطِع چفّينه وسهم بعيونه

سيدزيدالفحام

سيد زيد الفحام, [٢٣.٠٧.٢١ ١٥:٤٣]
نزله للعباس عليه السلام 2021

زينب تعنّت لبن ابوها العباس
جربه بأيديها لأيد راعي النوماس
گالتله انت البالشدد رفعة راس

هاي الجربه وروح امليها
وطفال التصرخ ارويها
…….

گاللهه يختي ماكو اسهل من هاي
رايح اجيب النهر مو بس الماي
عباس اخوج آنه الكفيل الوفاي

لحظات الماي تشوفينه
بَشّريها اطفالج وسكينه
………

اغضب العباس ولكد ميمونه
تجدح شرار امن التحدي عيونه
جيوش وعساكر عجزو يلاگونه

عباس وهد ياهو يردّه
إلّا بسيفه يرده لجدّه
………..

بجرف النهر عباس دگ الرايه
للعلگمي طب وغرف من مايه
ما شرب گبل حسين حاشه بهايه

امله الجود ورد لخيامه
ذلّ العدوان بصمصامه
………….

خل يسمع بهاي اللذي ماسامع
رد للخيم عباس يوم السابع
روّه العطاشه بچف يمينه القاطِع

من جاب الجربه عله امتونه
زينب وحسين يحيّونه

سيدزيدالفحام

سيد زيد الفحام, [٢٣.٠٧.٢١ ١٦:٢٤]
قصائد ليلة القاسم بن الحسن عليه السلام

سيد زيد الفحام, [٢٣.٠٧.٢١ ١٦:٢٥]
مقدمة للقاسم عليه السلام 2021

كل شاب خل ياخذ درس من موقف القاسم
ضحّه بحياته وماخضع. للحــاكـم الظـالـم
…………….

القاسم ابن الحسن هذا قدوه النّه
ياشباب اتعلّموا الاحكام منّه
ملتزم بحكام دينه بزغر سنّه
ما ترك عمّه الحسين وگال عنّه

الموت احله امن العسل لجلك ولا نادم
ضحّه بحياته وماخضع. للحــاكـم الظـالـم
…………….

عمره اربعطعش عام بكربله چان
شاف عمّه حسين وحده ابين عدوان
ضحّه دمه ونزل قاتل بني سفيان
الدنيا ما غرّته ولا تسويس شيطان

“لَبيكَ ياعَمْ” صرخته افدي العمر قادم
ضحّه بحياته وماخضع. للحــاكـم الظـالـم
…………….

هذا هوه القاسم الضحّه بحياته
ياشباب الواعي اخذوا من سماته
واجب احنه انتبعه نتحلّه بصفاته
ما خضع للباطل لساعة مماته

موقف بطولي موقفه طول الزمن قائم
ضحّه بحياته وماخضع للحــاكـم الظـالـم
…………….

تربية وايمان وخلاق ورجوله
فاهم الإسلام بفروعه واصوله
القاسم ابن الحسن واعي امن الطفوله
منّه ناخذ حبنه للباري ورسوله

متربّي بحضان الحسن حقّاني مو واهم
ضحّه بحياته وماخضع. للحــاكـم الظـالـم
…………….

المفترض كل شاب شيعي يصير مثله
ما يهادن ظالم وعالدنيه يعله
يتبع الحق ما يعوفه وينصر اهله
كون مثل القاسم يشوفون فعله

ينصر الحق ما ينثني بالموقف الحاسم
ضحّه بحياته وماخضع. للحــاكـم الظـالـم
…………….

شاب لكن وفّه للاسلام عهده
نزل للميدان قاتل دون مجده
أنگطع شسع النّعل اهوه يشده
ويلي لن العدو صابه بسيف حقده

وتخضّب بـدم النحـــــر شمعة بني هاشم
ضحّه بحياته وماخضع. للحــاكـم الظـالـم

سيدزيدالفحام

سيد زيد الفحام, [٢٣.٠٧.٢١ ١٦:٢٦]
رئيسية للقاسم عليه السلام 2021

يادوه اليشفي جروحي ضميتك بنص روحي
ابني وحبيبي الغالي ما حسّبتهه ابّالي
ياجاسم تفارگني. ياجاسم تفارگني
………………………

يُمّه الولد / سور وسند / للـوالــده بدنياها
بي تحتمي / ما تنعمـي / هوه نظر عيناها

وانت الصرتلي بدنيتي روحي وربيع سنيني
ياجاسم ومثل الهوى اتـنـفّـسـك تـدريني
ربيتـك وليــل الربه يتعّبنــي ويسلّينــي
اجمل ليالي امن العمر ما بينك وما بيني

ليل الربه الساهرته من اجلك اتحمّلته
تكبر الي وتبرالي. ما حسّبتهه ابّالي
ياجاسم تفارگني. ياجاسم تفارگني
………………………..

وجهك گمر / قربك نهر / وكت العطش يرويني
ايـدك دوه / عمرك ضوه / يطرد ضلام سنيني

امك يجاسم وفتخـر دلّلتك وربّيتك
تباريني وتجازي التعب من تكبر تمنيتك
ما حسّبت طف كربله بي تنذبح تاليتك
يايُمّه وبقه بلا ولد وفگد طعم حِنّيتك

ما حسّبت يعيوني. بمصابك يفجعوني
توگع ذبيح گبالي. ما حسّبتهه ابّالي
ياجاسم تفارگني. ياجاسم تفارگني
………………………..

بعدك نبع / نورك يشع / مو مالت يذبحونك
ما تحتمل / سيف ونبل / ياجاسم يأذّونك

سيوف آل امية الباشطه تنتظرك وماترحم
للحومه جاسم لو رحت تتگطّع وما تسلم
ابچي واموت امن الألم يوليدي من تتألّم
اربعطـش عـام ورحت. للفاجعــه تتحزّم

مو تدري جاسم يبني توديعك ايعذّبني
مفجوعه ارحم حالي ما حسّبتهه ابّالي
ياجاسم تفارگني. ياجاسم تفارگني
………………………..

عود الامل / مات وذبل / ما حقّقت امنيتي
بدال الشمع / ونّه ودمع / والحسره تترس بيتي

امنيتي چانت يالولد عريس اشوفك يُمّه
بثوب الزفاف الهاشمي وكل الاهل ملتمّه
اتحنّه يبني بحنّتك ثوب العرس اشتمّه
ماحسّبت آ يازمن يتحنّه تالي ابدمه

سهام العدو چتاله ودّوسك الخيّاله
بالحومه ميّت تالي ما حسّبتهه ابّالي
ياجاسم تفارگني. ياجاسم تفارگني
………………………..

طب للحرب / لبّ الگلب / وتحاوشوه عدوانه
ابني الشهـم / ذلّ الزلم / زلزل ارض ميدانه

شسع النعل عنده انگطع اهوى يشدّه بچفّه
لن العدو صابه اوّگع ابني وتفايض نزفه
جابوه الية بياوضع صاير وذر ماعرفه
عريس لكن بالحرب بين السيوف الزفه

وبحجري من خلّيته آخر نبض حسّيته
وتخيّبت آمالي ما حسّبتهه ابّالي
ياجاسم تفارگني. ياجاسم تفارگني

سيدزيدالفحام

سيد زيد الفحام, [٢٣.٠٧.٢١ ١٦:٢٧]
نزلة للقاسم عليه السلام 2021

لبيكَ ثار الله لبيكَ ياعَمّاه
موتي حلا في كربلا لبيكَ ياعَمّاه
…………..

ياعمي آني القاسم وصوتك سمعته
وحدك غريب بكربله دينك نصرته
بس عمري عندي هالعمر لجلك وهبته
خليني اتگطّع وذر بس ترضه انته

الذلُّ لا ارضاه. والموتُ لا اخشاه
فيكَ العُلا. في كربلا لبيكَ ياعَمّاه
……………….

وصّاني ياعمي الحسن يوم المنيه
دونك اقـاتـل سيـدي بالغـاضـريه
حان الوعد ياعم وخذ هاي الوصيه
ارخصلي آخذ ثاري من گوم آل اميه

قد حانَ يومُ الثارْ ويلٌ لأهلِ النارْ
مِن صَولَتي. وصَرخَتي لبيكَ ياعَمّاه
………………..

جيوش آل امية حاطتك من كل الاكتار
المن اضم حيلي واشوفك بين الاشرار
شبل الحسن آني الفتى وبچفي بتّار
نازل ازلـزل كربـله وما اتـرك الثار

إنّي أنا الرَمّاحْ سأقبِض الارواحْ
سيفي لَضى فيهم قضى. لبيكَ ياعَمّاه
…………………

انطاه اذن عمّه ونزل للحومه غضبان
مثل الحسن لمن هجم زلزل الميدان
خيل وزلم ذلهه وبچت من سيفه فرسان
القاسم مثل عوده الحسن بالحومه بركان

قد جندل الابطال. نادى بصوتٍ عال
لا أنثَني. لا أنحَني. لبيكَ ياعَمّاه
………………….

لوما گطِع شسع النعل ما يهوى هيهات
دنّگ يشدّه القاسم بوسط الجراحات
عالهامه صابه الناصبي وبجسمه طعنات
بحجر الحسين بكربله شبل الحسن مات

نِعمَ الفتى للعَمْ اوفى بما اقسَمْ
فِدائهُ اعضائهُ لبيكَ ياعَمّاه
……………………

للخيمه جابه بياوضع يتنازف جروح
شاب بعمر اربعطش ياويلي مذبوح
مفجوعه امّه شبگته تشتمّه وتنوح
متحنّي من دم رگبته ومابي بعد روح

مِن حُزنِها الفَتّاكْ رَقّتْ لها الافلاكْ
نَحرُ الفتى. صوتٌ اتى. لبيكَ ياعَمّاه

سيدزيدالفحام

______________________________&

سيد زيد الفحام, [٢٣.٠٧.٢١ ١٧:٣٧]
قصائد ليلة علي الأكبر عليه السلام

سيد زيد الفحام, [٢٣.٠٧.٢١ ١٧:٣٩]
مقدمه علي الأكبر عليه السلام 2021

گمر يضوي بجماله
رسول الله بخصاله
علي الأكبر نزل بالغاضريه
………….

علي الأكبر دخلها ساحة الموت
شبيه المصطفى بالصوره والصوت
مثل حيدر اذا للمعركه يفوت
قسم ميخلّي بالطف روح طاغوت

گطع روس الضغينه
اخذ ثاره بيمينه
جثث خلّاها ترجف عالوطيه
………….

دخل للمعركه وشتد نزاله
بعلي ذكّرهم وهيبة قتاله
زلم وخيول ترجف من خياله
علي الأكبر مثل راعي الكفاله

صبغ سيفه بدماهم
غدت ظلمه سماهم
اجاها وشردت جيوش آل اميه
…………
بألف ينعد نزل بكر ابن غانم
لعلي الأكبر يريد يقتله قادم
امام العسكر بحدّت الصارم
خطف راسه علي ليث الهواشم

گطع بالسف راسه
علي وبمهره داسه
اخذها الشمره من حامي الحميه
…………..

قَسَم لوما الغدر ما خَلّه بيهم
علي الأكبر غضب نازل عليهم
تطير الروس گامت وي اديهم
يشردون وعلي مگابل يجيهم

على حدود المخيّم
جثث غـرّگها بالدم
فنه بسيفه الاعادي الناصبيه
…………….

غزاهم ما وگع من ظهر مهره
غدِر غدرو علي ما بان كسره
أبن مُنّقِذ العبدي طعن ظهره
شَهيداً طاح وتوسّد الغبره
أبه أدركني ناده
على تراب الشهاده
تگطّع جسمه بسيوف المنيه
……………..

ابو الأكبر وگع من وصل يمّه
مخضّب شاف ابنه بفيض دمّه
تمدد وي علي يشبگه ويشمّه
على الدنيا العَفه يبچي ويكلمه

حمل للخيمه جسمه
هوت من شافته امّه
تودعه وتصرخ بصوت الرزيه

سيدزيدالفحام

سيد زيد الفحام, [٢٣.٠٧.٢١ ١٧:٣٩]
رئيسية علي الأكبر عليه السلام 2021

رايـح للمنيـه وعايف امّك بجروح المصيبه
اگرب خل اودعنّك وشمّك ياجرحي وطبيبه
بُعدك ياعلي نار
ينهد حيلي ونهار. بجروح المصيبه
…………

اعز من روحي وسنيني اعزّك ياعلي الأكبر
اذا ما اشتم خدودك اموت وگلبي يتفسّر
بديّة وليدي ربّيتك وگلت تجزيني من اكبر
ابد ما حسّبت يبني تموت بگطعة المنحر

وين اخفيك يبني وين اضمّك. عن سيوف اميه
تگطيعك اتـريـــد وسفك دمّك آ يالغـاضــريـه
ابچي وگلبي محتار
ينهد حيلي ونهار. بجروح المصيبه
…………

ولد ما عندي بس انت يروحي ويانبض گلبي
ذخر ليامي ولشيبي طلبتك يُمّه من ربي
ضلام الدنيا من دونك يشمعه النوّرت دربي
صدگ تتركني يوليدي يحلمي وياثمر تعبي

تتگطّع وذر بسيوف ورماح. هذا الماحسبته
حيل امّك تهدّم والحلم راح. بمصابك فگدتّه
ليش الزمن غدّار
ينهد حيلي ونهار. بجروح المصيبه
…………

يوارث كل صفات النور مُحَمّد سيّد الاكوان
اذا نشتـــاق للهـادي. نظرنه بوجهك الريحان
شبيهه بمنطِقه وخُلقه عظيم المنزلة والشآن
عجـب تتجـرّأ تذبحك ييُمّه ياعلي العدوان

المثلك ياعلي يبوسون ايدك ريحانة مُحمّد
ليش تناخو لگطعت وريدك. والعكسر تحشّد
غربة وكثرت اشرار
ينهد حيلي ونهار. بجروح المصيبه
…………

گعد يم امّه شبل حسين يحبها ويمسح الدمعه
شبگت آخــر الانفـــــاس ابنها تشبگه وتودعه
اصبري يگلهه عالمكتوب. مثل ما صبرت البضعه
وداعــــــاً يُمّـه يا ليـله يحاچيها وهي تسمعه

وحيد بلا مناصر والدي حسين ما بين النواصب
فدوه لوالدي دم نحري والدين. افدي روحي ذاهب
لتهلّين الاعبار
ينهد حيلي ونهار. بجروح المصيبه
…………

نزل للمعـركه الأكبـر يقاتل دون ابواليمّه
قتال المرتضى الكرار ذل العسكر بعزمه
يموت وينشطر راسه كلمن يقترب يمه
لوما ينغدر بالسيف ماسال وجره دمّه

طاح امن المهر بين آل اميه ياويلي وتگطّع
بسيوف النواصب عالوطيه. جُثمانه توزّع
موضع للطعن صار
ينهد حيلي ونهار. بجروح المصيبه
…………

جابه حسين للخيمه موذّر طبره يم طبره
امّه تلگته ليلة ابنها الواحد اتنظره
يُمّه يا علي الأكبر تصيح وتهمل العبره
ساعه اتقبّل اخدوده ساعه اتشمّه من نحره

تلطم عالوجه وتصيح ويلاه. ابني مگطّعينه
مگطع بالسيوف وتنزف دماه يم امّه الحزينه
متوذر بالاشفار
ينهد حيلي ونهار. بجروح المصيبه

سيدزيدالفحام

سيد زيد الفحام, [٢٣.٠٧.٢١ ١٧:٤٠]
نزلة علي الأكبر عليه السلام 2021

مصرعك اعظم رزيه ياعلي
ماتن متوني واديه ياعلي
………………

آنه ابوك حسين يانبض الگلب
ياعلي الأكبر صعب فگدك صعب
كوكب امن الكون طايح عالترب
بالسيوف مگطّع ودمك يصب

الله يلعن آل اميه ياعلي
ماتن متوني واديه ياعلي
………………

ياعلي بعدك عله الدنيا العَفا
ما اريد العيش من بعدك كفى
بمصرعك فجعوا ابونه المصطفى
نورك الوهّاج بالدم اختفى

گطّعوك عله الوطيه. ياعلي
ماتن متوني واديه ياعلي
………………

چم جرح مجروح يبني وچم رمح
ريت گبلك ياضوه عيوني انذبح
خذوا وجهك مني ياوجه الصبح
بگلب ابوك حسين ما يشفه الجرح

مادريت اصّار بيه. ياعلي
ماتن متوني واديه ياعلي
………………

سيوف اميه گطّعت جسمك وذر
شلون اشيلك وآنه مكسور الظهر
شلون ارجعك للخيم دامي النحر
امّك اتّـانيك يا نور البصر

تشوفك بياحال هيه. ياعلي
ماتن متوني واديه ياعلي
………………

حيلي طاح ومابقه يوليدي حيل
من شفت دم نحرك الغالي يسيل
علي الأكبر يبني يالمالك مثيل
شما اسولف وحچي عن جرحي قليل

غافي بحضان المنيه. ياعلي
ماتن متوني واديه ياعلي
………………

ضاگت الدنيا ببوك بنينوى
وختنگ صدري علي وضاع الهوى
الضوه انت چنت راح الضوه
ريت يوليدي علي متنه سوه

انت للباري ضحيّه. ياعلي
ماتن متوني واديه ياعلي

سيدزيدالفحام

سيد زيد الفحام, [٢٣.٠٧.٢١ ١٧:٥٥]
مقدمه علي الأكبر عليه السلام2021

اَصبـر بمصــابـك لتوصّينــي
من نظرة عينك فهمت عيني

……

يسلوة روحي يُمّه وياثمر تعبي
علي الأكبر يمن وجهك يسر گلبي
تعال اگرب ييُمّه واگعد بقربي
شفت نظرات عينك بالحزن تربي

تريد تودّعني وتخلّيني
من نظرة عينك فهمت عيني
………….

عليك تعوّدن يالأكبر عيوني
شلون تريد بمصابك يفجعوني
رجف گلبي ييُمّه ونخطف لوني
تظل وياي ظني وخابت ظنوني

عطشانه وغيرك ما يرويني
من نظرة عينك فهمت عيني
……………

تعوف امك غريبه شلون يالأكبر
وخاف عليك يبني امن الهوى لو مر
تالـي بكـــــربله يوليـــدي تـتـوذّر
بسيوف ال اميـة ترجـع امطبّـر

ياشمعة عمري ونور سنيني
من نظرة عينك فهمت عيني
……………..

اودعك يبني لكن ضاگت انفاسي
من هسّه انجرح يالأكبر احساسي
عفتني لدنيا ظلمه ولزمن قاسي
امبارك يالتريد لدينك اتواسي

يكتـل هجــرانك يموافينـي
من نظرة عينك فهمت عيني
……………..

إصبري يگلها يُمّه يعوضچ الباري
اريـــد امـن ال اميــة آخــذ بثاري
ابويه حسين وحده وشنهي اعذاري
ازلـزل كـــــــــربله تسمعيـن اخباري

يايُمّه الواجـب انصر ديني
من نظرة عينك فهمت عيني
……………….

گبل لا تمشي اگرب خلّ اودعنّك
علي الأكبر اريد اشبع نظر منّك
يريت يصير وشگف كل جرح عنّك
ولا خلّي السيوف أبـداً يگطعنّك

ما يرحم دهري من يسبيني
من نظرة عينك فهمت عيني

سيدزيدالفحام

سيد زيد الفحام, [٢٣.٠٧.٢١ ٢١:١٥]
عبدالله الرضيع عليه السلام

سيد زيد الفحام, [٢٣.٠٧.٢١ ٢١:١٦]
مقدمه // عبدالله الرضيع عليه السلام 2021

دللّو يالولد عن لا يسمعونك
لا تصرخ يبعد امك يذبحونك
……….

لا تصرخ يعبدالله السهم يتناك
منين الماي اجيبه الماي بيد عداك
رضيع بياذنب يبني العطش اذّاك
يبّس چبدتك يبني وخطف لونك
……….

اغفه بحجري يُمّه وانسه طاري الماي
يعبدالله واريـــدك من تون بهداي
اخافن حرمله يسمعك يضي عيناي
يبني بنبله مو بالماي يسگونك
……….

يعبدالله العطش يبّسهن شفافك
وحسين انهضم يوليدي من شافك
شالك بين اديه والموت چن طافك
خذاك لگوم امية المايرحمونك
………

رحت لحظات لن الموت گدامك
خطفهن حرمله بسهامه احلامك
السهم صابك ييُمّه وزوّد آلامك
ليش بياذنب ضامي ويقتلونك
………..

رضيع وضامي صابك حرمله بسهمه
مثلك يارضيع اتروّه من دمّه
السهم ذابح رگبتك يُمّه يايُمّه
عسن جف الفرات ولايحرمونك
………….

اجيت بلايه روح وتنزف دمومك
سهمك بالنحر ومخضّبه هدومك
عسن يومي يعبدالله گبل يومك
ولا انظرهم بعيني يأذّونك

سيدزيدالفحام

سيد زيد الفحام, [٢٣.٠٧.٢١ ٢١:١٦]
رئيسية //عبدالله الرضيع عليه السلام 2021

لا تبچي يُمّه امن العطش. لتگول عطشان
عبدالله ينتظرك سهم بچفوف شيطان
توجّه عليه
سهم المنيه. بچفوف شيطان
…………..

يُمّه ياعبدالله يُمّه / اليعطش يسفكون دمّه/ مدري ليش بكربلاء
لا تگول الماي اريده/ طلبتك صارت بعيده / طلبه ناتجهه الدماء

اخذ ماي الدمع يوليدي وشرب ماي
لا تمشي لعدوّك ابقه يبني وياي

لو يبسن شفافك اخذ دمعات عيناي
ما ترحم عيون البشر وعيون دنياي
بالغاضريه
سهم المنيه. بچفوف شيطان
…………..

طحنه بچفوف النواصب/ بكربله ارض المصايب/منعوا علينه الفرات
ذاك ابوك حسين وحده/ امن العطش هم ذاب چبده/واحد ابّين الطغاة

احنه بگاع صحره وتلهب الخيمه
ننظر للسمه وماجابت الغيمه

يوليدي ما تحمل ضمه لونك تغيّر
بعــدك رضيع بياذنب چبدك تفطّر
تصرخ بديه
سهم المنيه. بچفوف شيطان
…………..

حرمله يدورك حچولي / گمت اهز مهدك ولولي /بلكي ما تصرخ تنام
ولاتروح گبال عينه / حرمله بچفّه اللعينه/ يرمي نحرك بالسهام

بحضن امك رباب اتهنّه بالنومه
لا تطلع ييُمّه الدنيا مسمومه

نار الضمه بلكت اخف تحمل ألمهه
نار السهم تذبح نخر يكتل سهمهه
اعظم رزيه
سهم المنيه. بچفوف شيطان
…………..

ما نفع دمعي وكلامي/ انت ياعبدالله ضامي/يسعر بچبدك جمر
من خذاك حسين منّي/ لساحة الميدان لنّي /اشعر بجرح الغدر
خذاك وصاح ياشيعة بني سفيان
اسگوا الطفل هذا بياذنب عطشان

صار النزاع وحرمله. عاين رگبتك
گطّع وريدك بالسهم. تصرخ سمعتك
نار وأذيه
سهم المنيه. بچفوف شيطان
…………..

والــدك جـابـك اليـة/مخضّب ابدم المنية/ونابت بنحرك سهم
عيني ما تگدر تشوفك/ بالمهد ميّت وطوفك/ راح اموت امن الألم

دم نحرك يصب والرگبه مذبوحه
رضيع وسهمك اكبر منك جروحه

هذا الخفت منه حصل ياسلوة الروح
حرموك من ماي النهر. رديت مذبوح
وشخلّه بيه
سهم المنيه. بچفوف شيطان
…………..

ماتت البسمه عله ثغرك/ونگطع بالنبله نحرك/ونصبغ وجهك دمه
يارضيـعي الماتهنّـه / ياترف ياطير جنّه. / من سُلالة فاطمه
شكثر حنّيت اشبگك يُمّه عبدالله
خذاك الموت وعليك السهم صلّه

حار الرمل لا تنچوي جرحك يأذّيك
نيّمتك ابحضني وردت. تگعد وناغيك
صاب الزچيه
سهم المنيه. بچفوف شيطان

سيدزيدالفحام

سيد زيد الفحام, [٢٤.٠٧.٢١ ٠٩:٥٧]
قصائد ليلة الوداع

سيد زيد الفحام, [٢٤.٠٧.٢١ ٠٩:٥٨]
مقدمه ليلة الوداع 2021

وداع احباب / يتبعه مصاب / يليل العاشر اتمهّل
…………..

يليل العاشر ارحمنه بضلامك طول
اخت وتودع اخوتهه العذر مقبول
اذا طر الصبح تهجم زلم وخيول
بعد هالليله ما ادري الوضع مجهول

بعد ساعات / تجي النكباب/ بحرم وطفال اتكفّل
……………

اروح لخيمة ابن امي عزيز الروح
اخويه حسين اودعنّه گبل ليّروح
اودعه بحزني ودموعي وگلب مجروح
عله المتواعد بذبحه شيفيد النوح

صدك ياليل / تدوسه الخيل / اشوفه شلون وتحَمّل
……………

يليل العاشر اسمحلي اظل ويّاه
اريد اشبع نظر منّه حبيب الله
اذا باجر مشه عني صعب ألگاه
احسّ بگلبي يتلاهب جمر فرگاه
اصيحن وين / اخويه حسين/ اضيع بفگده ما اندل
……………

بعد عندي اخو ثاني يشيل الراس
كفيلي وصاحب الرايه هوه العباس
يليلي وتعرف اوصافه ابوالنوماس
اودعه الليله بحزاني وداع احساس

كفلني وجيت / ولاحسّيت / تعب وبجاله ادلّل
……………

يطيح عله النهر باجر عضيد حسين
يضل عالمشرعه نايم بلا چفين
فقط هالليله ياليلي تشوفه العين
اذا راح الكفل خدري اجيبه منين

الصبح لو صار / تشب النار / بخيمنه واهلي تتقَتّل
……………

اليّة ويالكفل خدري يليل عتاب
صدك عباس يتركني بدين اجناب
إنه الماشافو خيالي الحضر والغاب
صدك يحدي الشمر بيه ولا انهاب

الدهر غدار / غدرني ودار / عكس ما اهوى وتئمّل
……………

إنه بضعة علي زينب امير الكون
اروح عله الهزل باجر يليلي شلون
ضحايا اخواني بالحومه ولا يدرون
عله زينب لو مشت باجر تصدّ عيون

ولا عالبال / بديه حبال / وطب للشام وتعلعَل

سيدزيدالفحام

سيد زيد الفحام, [٢٤.٠٧.٢١ ١٠:٠٠]
رئيسية ليلة الوداع 2021

مجتمعين اطفــال وحـرم بالغاضريه
مجتمعين. لوداع الحسين ابن الزجيه
بدموع الألم
مابين الخيم. مجتمعين مجتمعين
………………

نقـره بليلة العاشـر وداع حسين
زينب والحرم وطفال ملتمّين
يحاچونه ويودعونه بدموع العين
ساعات ويذبحونه بصباح البين

يتمنّون. ليل يظل ولا يطلع صباحه
يتمنّون. حسين وياهم وتبعد جراحه
ويرفّ العَلَم
مابين الخيم. مجتمعين مجتمعين
……………….

يودع اطفاله ابواليمه ويسلّيهم
خيمه حسين چان بكربله عليهم
بعد ساعات من يمشي ويخلّيهم
زلم وخيول تهجم من يحاميهم

عالاطفال باجـر تستعـــــر نـار المخيّـم
عالاطفال. تسحگ خيل امية وصعبه تسلم
والموت انرسم
مابين الخيم. مجتمعين مجتمعين
………..

زينب والرباب وليله وام جسام
رقيه وفاطمه وسكينه والايتام
يودعون الحسين بدمعة الالآم
بس هالليله يمهن ناصر الاسلام

صاحن صوت باجر لو رحت يصعب امرنه
صاحن صوت. خدّر والشمر يسلب خدرنه
والحيل انهدم
مابين الخيم. مجتمعين مجتمعين
………..

زينب حاچته ودمعتها عالخدين
اموت ولااشوفك تنذبح يحسين
وتهجم عالمخيّم لو طحت صوبين
لو حرگوا خيمنه نضيع نطلع وين
گلي شلون. اصبر لو شفت جسمك توذّر
گلي شلون. راسك عالرمح لو شفته اگدر
والعسكر هجم
مابين الخيم. مجتمعين مجتمعين
…………..

يزينب گلهه يختي ويانظر عيني
اصبري وعالمصايب يختي عينيني
اذا شفتي الشمر يم راسي عوفيني
الشمر مايرحم بحالچ يأذّيني

لا تبچين. لو شفتي ارتفع راسي برمحهم
لا تبچين. حفظيلي اليتامه وصيري امهم
وگفاتچ اهم
مابين الخيم. مجتمعين مجتمعين
…………..

اودعچن خواتي وياحرَم جدي
لو طر الصبح كل المحن تبدي
اصبرن عالمصايب والسبي بعدي
باجر بالظعن شمر الخنا يحدي

لرض الشام. باجر عالهزل تمشن سبايه
لرض الشام وتشوفن اشد وعظم رزايه
واقع مو وهَم
مابين الخيم. مجتمعين مجتمعين

سيدزيدالفحام

سيد زيد الفحام, [٢٤.٠٧.٢١ ١٠:٠١]
ليلة الوداع 2021

بعيوني لاح السبي. بوداع اخوتي
صار الأجل مطلبي. بوداع اخوتي
ليلة وداع وآخـر اللقـاء
لو طر صبحنه يبتدي البلاء
بوداع اخوتي
……………..

ليلة العاشر جرح
ينزف لوجه الصبح
بيها بس طاري الذبح. والمصيايب

الليله توديع اخوتي
ونار تلهب حسرتي
من مصابي وحيرتي. گلبي ذايب

شلون اودع حسين اخويه آ يدهري
بدال عمره الموت ياخذ ريت عمري
ولا اشوفه عله الوطيه ودمه يجري
بسحگت الخيل عله صدره يموت صبري

طَـوّل يليـل الدمــع. اشكيله حالي
بحسين اريد اجتمع. اشكيله حالي
رجوه ارتجيتك وقبل الرجاء
لو طر صبحنه يبتدي البلاء
بوداع اخوتي
……………..

حايره ابّين الخيم
امشي وعثر بالجدم
حيلي ياليل انهدم. خاب ظنّي

لخيمة حسين ادخلت
ستقبلاتي وگـعــدت
هـا يبوالأكبـر گلت تمشي عنّي

صدك باجر تنذبح يبن الزجيه
عالرمح راسك يرفعوه آل اميه
وجسمك ادّوسه الخيول الاعوجيه
والشمر يسلبني آنه الهاشميه

بعدك حياتي عدم. اتمنّه ميته
صعبه وكتلني الألم. اتمنّه ميته
شخلّت يخويه بيّة كربلاء
لو طر صبحنه يبتدي البلاء
بوداع اخوتي
……………..

هذا مكتوب الامر
لزمي روحج بالصبر
والعذر ليج العذر. يالعقيله

آنه ابوالأكبر تره
ابقه طايح عالثره
والضلوع امكسّره. باقي ليله

هذه آخر ليله يمج يالحنينه
بالحرم اوصيچ يختي وبالظعينه
من يجيني الشمر بِعِدِي ولاتجينه
خوفي يضرب متنچ بچفه اللعينه

ياويلي تحني الظهر. هاي المصيبه
منك سمعته الخبر. هاي المصيبه
وين المفر لو حرگو الخباء
لو طر صبحنه يبتدي البلاء
بوداع اخوتي
……………..

يابوفاضل كافلي
يالگلتلي ادلّلي
منهو بغيابك الي. رد عليّة

يالجبتني امن الوطن
خويه ياحامي الظعن
تدري غــدّار الزمن. يقسي بيّة

يابوفاضل لو طحت يم الشريعه
يعني ما تكدر تجي چفوفك گطيعه
توصل خيامي العده هاي الفجيعه
ترضه بينه تضيك يالغالي الوسيعه

يسلب خواتك شمر. لو فارگتنه
ما يبقه سالم خدر. لو فارگتنه
نفگد خدرنه بطيحة اللواء
لو طر صبحنه يبتدي البلاء
بوداع اخوتي
……………..

گلهه يابت فاطمه
اقسم بحامي الحمه
إلّا سوّي ملحمه. عالشريعه

آخذ بثار الحرم
اوگف بحَدّ الخيم
افني عدوانچ قسم. يالوديعه

لا يهمچ يختي مادام آنه موجود
والله ماتكدر علية حشود وحشود
إلّا ذا غدروني يختي وطاحن زنود
هناك عذريني اذا طيّحني عامود

لو راسي يختي انهشم. عذريني يختي
لو عيني سدها السهم. عذريني يختي
متقصر ادري طبعك الوفاء
لو طر صبحنه يبتدي البلاء
بوداع اخوتي

سيدزيدالفحام

سيد زيد الفحام, [٢٤.٠٧.٢١ ١٠:٠١]
نزله ليلة الوداع 2021

بس هالليله حسين ويانه
………

بس هالليله ويانه وباجر
عالتربان يسحگه الحافر
اتمهّــل يا ليل العاشر
چم عين التهمل سهرانه
……….

نسهر ويّه حسين الليله
اطفـال وخـدّر نشكيله
ملتمّه عله حسين العيله
نبچي ونتحسّر خلّانه
……….

لا تخلص ياليل بسرعه
غالي حسين انريد انودعه
محتار ينشّف چم دمعه
نصبـر نتحمّـل وصّانه
……….

چم طفله وطفل اليبراله
يا ليل مچلّب بذياله
گلبه تأذّه لهاي الحاله
صَبّرنه وزادت احزانه
………..

فجعتنه رقيّة ابمحنتها
شبگت والدها بدمعتها
يا بابا تصيح بحسرتها
لا تتركنه ولا تنسانه
…………

صَبرها حسين وسلّاها
ما تترك زينب وصّاها
نيّمها بحجره وناغاها
طفله وهالمنظر اذّانه
…………

زينب آني ودمعي اتفجّر
من ودّعت حسين واكثر
گلبي اتأذّه بشَمّ المنحر
باجر يتگطع شريانه

سيدزيدالفحام

سيد زيد الفحام, [٢٤.٠٧.٢١ ١٠:٥٦]
مقتل الحسين يوم العاشر 2021

شفت المصيبه بعيني
من طاح ضامي حسيني
امتار بينه وبيني يامن تسئلون
………

شحال التشوف بكربله بسيوف اخوها توذّر
واحد وسط سبعين الف داروا عليه وطّبّر
وشلون اخلصه امن العده حرمه وحرت ما اگدر
وبسهم لمثلث شفت صدره الشريف اتحفّر

شفت الشمر متربّع بصدره
جرّح رگبته بثنعش طبره
ضامي ويحزّ امن الکفه نحره
ناديته ارحم والد العتره

لمن سمعني المرتد
يطبر اخويه اتعمّد
والغالي دامي امدّد. بين اليذبحون
………..

لمن وصلت لمصرعه. لن اللعين اگبالي
شايل رمح وعله الرمح راس الحبيب الغالي
يتبسّم بوجهي الشمر. عمداً حرگ دلّالي
يلچم جرح راس الولي اذّاني رمحه العالي
والخيل هجمت داست بجسمه
كسرت ضلوعه ورضرضت عظمه
عله حسين ناس وخيل ملتمّه
لا اخو ظل ولا ابن يمه

معقوله هذا الشفته
ابن امي داسو جثته
لو بيدي اگدر شلته. عن اليدوسون
……………

صدره انفرش ويّه الارض من داسته الخيّاله
ياخيـل هـذا ابـن النبي بسچن درحمن حاله
شبيچن تدوسنّه بحقد الحافـر مـرد دلّاله
عوفن ولو منه عظم سالم يظل لعياله

هاي اليتامه منهو يرعاها
بس العليل المبتلي وياها
سوط الشمر والخوف اذّاها
ونار الخيم مستعره فوگاها

راعي العلم چا وينه؟
عالمشرعه مگطعينه
وتـگـطّـعـن چفّينــه. حمّاي لظعون
……………
ابن امي مات امن الشمس لا يمه نخله ولا ماي
بجروحه تچوي وبالنحر عالرمل متأذّي هواي
هذا الحُسين المنذبح ياشمس هونج بهداي
اتمنّه ابقه ابمصرعه اوگف وسويله افياي

تغيّر يويلي امن الشمس لونه
ابن الزجية الكل يعرفونه
بلا دفن ظل وما يرحمونه
جسمه انسحگ ويلي ويسلبونه

مطّشّر بوجه الگاع
والخنصر الگطعو ضاع
مو ضلع كسروله ضلاع. ناس اليبغضون
……………

مجبوره اعوفنّه وأرد حفظ الحرم وصّاني
تمنّيت عباس بعَلَم. كافلني يتلگّاني
ويشوف نار عله الحرم تتلاهب بصيواني
عباس طاح عله النهر. هيهات يرجع ثاني

زينب جبتها تكفّلت بيها
عباس شوف شصاير عليها
اختك يخويه الشمر سابيها
نظرة شماته تشوف تاليها
باجر اخونه نعوفه
نطلع سبي للكوفه
فوك الهزل مچتوفه. بين اليشمتون

سيدزيدالفحام

سيد زيد الفحام, [٢٤.٠٧.٢١ ١٠:٥٧]
مصاب يوم العاشر 2021

وا حُسيناه. وا حُسيناه. وا حُسيناه

رجع مهر حسين خالي حسين ما رد للخيم
يصرخ بصوته الضليمه وگلبي ياناس انلچم
گتله يالميمون ريّض صرختك حيلي انهدم
وين ابوالسجاد عفته ليش سرجك كلّه دم

وا حُسيناه وا حُسيناه. وا حُسيناه
………….

گَلّي يازينب دلحگي حسين حز نحره الشمر
لحگي لا ينداس صدره وبالحوافر ينكسر
شلون امشي هوه وصّه حسين ماعوف الخدر
شلون اصبر ما اشوفه ونار گلبي تستعر

وا حُسيناه. وا حُسيناه. وا حُسيناه
…………..

ركضت الحره العقيله. صعدت التلّ بقهر
حسين يبن امي وحبيبي تصيح والمدمع نهر
وين طايح رد علية گلبي يبن امي انكسر
هاي عدوانك اجتني وانت ما منك خبر

وا حُسيناه. وا حُسيناه. وا حُسيناه
……………

لحظه لن تشوف زينب عالرمح راسه ارتفع
يعني مات حسين ضامي عالرمل نحره انگطع
عالوجه لطمت اديها لحدما دمها طلع
زينب وشافت عليهه عسكر يزيد اندفع

وا حُسيناه. وا حُسيناه. وا حُسيناه
………….

بين خيل ونار زينب تركض ابين الزلم
ساعه تطفي النار ساعه تجمع اطفال وتلم
ساعه تشگف سوط ظالم عن متن طفل اليتم
عينهه لصوب الشريعه وين عباس الشهم

وا حُسيناه. وا حُسيناه. وا حُسيناه
………….

لحظه لن ضاعت رقيه دوّرتها ومالگت
صدت وشافتها تركض نار بيها تعلّکت
والشمر يركض وراها الخوف عَثّرها وهوت
حيل جر منها التراچي سال دمها اتعذّبت

وا حُسيناه. وا حُسيناه. وا حُسيناه

سيدزيدالفحام

سيد زيد الفحام, [٢٤.٠٧.٢١ ١٠:٥٨]
قصيده في يوم العاشر من محرم بعد مقتل الحسين عليه السلام 2021

حسين طايح عالثره مگطعينه
ياعلي ماتحضر اتحامينه
ياحيدر. ياحيدر
……….

عشره عاشور الظهُر
حسين طاح امن المهُر
من ألم سهم الچبد گـدامي

ظل يلوج عله الترب
وينزف صواب الگلب
تربّع بصدره الشمر متحامي

نحر ابواليمه انگطع
عالرمح راسه ارتفع
وداست الخيل عله صدره الدامي

هجمت خيول آل امية علينه
ياعلي ماتحضر اتحامينه
ياحيدر. ياحيدر
…………….

ياعلي العسكر هجم
عاليتامه وعالحرم
سلّبونه والخيم حرگوها

بويه چم طفله وطفل
بالحـوافـر ينچتــل
واليتيمه التصرخ يضربوها

وين نمشي ليا كتُر
والخيم تسعر جمُر
كل زلمنه ياعلي ذبحوها

والشمر ترضاها يسلب بينه
ياعلي ماتحضر اتحامينه
ياحيدر. ياحيدر
………….

آنه زينب ياعلي
حايره وماظل ولي
بس عليل وحاير بآلامه

نار تسعر بالخيم
فرّت اطفال وحرم
حسين طايح من يلمّ ايتامه

والكفلنه عله النهر
لا چفوف ولا بصر
وضربة العامود خسفت هامه

حامي خدري گطّعو چفينه
ياعلي ماتحضر اتحامينه
ياحيدر. ياحيدر
………….

صحنه ياحيدر مدد
انت حلّال الشدد
شعطّلَك عن كربله ومابيها

احضر وشوف الجَرَه
حسين گطعو منحَرَه
والحرم ياحيدر مسلبيها
موت وسياط وزجُر
ويـن ياحيـدر نفُـر
حرگو خيام اليتامه عليها

نركض وجمر الخيم يچوينه
ياعلي ماتحضر اتحامينه
ياحيدر. ياحيدر
………….

حسين طايح عالثره
وطاح سبع الگنطره
من يحامي عيلتك حاچيني

ياعلي خيل وعِدَه
چم عدو علينه اعتده
چم اخو مذبوح شافت عيني

چتّفونه بالحبل
باجر بنوگ الهزل
بويه ترضاها الشمر يسبيني

من عكب عباس من يحدينه
ياعلي ماتحضر اتحامينه
ياحيدر. ياحيدر

سيدزيدالفحام

سيد زيد الفحام, [٢٤.٠٧.٢١ ١١:٠٦]
ليلة الوحشة 2021

نمنه بارض هيمه.
لا والي لا خيمه
ظلت حرم وطفال
عكب اخوتي بياحال
لا والي لا خيمه
……………………….

ليلة الوحشة مصيبه ليلة احزان وعذاب
لا خيم ظلّت علينه والولي اليحرسنه غاب
بس عليل ويانه باقي گلبه منّ المرض ذاب
عكب ابواليمه ودَلَاله الليله نمنه عله التراب

راح اليـدلّلِنـه
خيمه وسند ألنه
لا والـي لا كفّال
عكب اخوتي بياحال
لا والي لا خيمه
…………………………

يالچنت تحرس خيمنه يابوفاضل هسّه وين
ريتك تشوف الجرالي والجَرَه بحال الحسين
آنه ممتحنـه بعيــــالـه وهوه مذبوح الوتين
ليلة ظلمه وخوف بيها. وحنه كلنه مچتّفين

الماشافو خيالي
گعدتهم اگبالي
چم ناصبي چتّال
عكب اخوتي بياحال
لا والي لا خيمه
……………………….

بآخر الليل وظلامه آنه لحسين اعتنيت
اعثر بجدمي وادوّر عن ابوالأكبر مشيت
بالترب مطموم شفته مسلّب ودامي بچيت
هوه لو مو هوه اسأل روحي يمّه اتحيّريت

انحب طحت يمّه
اجمع وذر جسمه
دمعي عله نحره سال
عكب اخوتي بياحال
لا والي لا خيمه
……………………….

مكسّره ضلوعه شفتهن من اثر سحگ الخيول
والسهام مغطية جسمه نبتت بصدره النصول
ولمثلّث شفتـه طالع من ظهـر ابـن البتول
شصاير بحالك گلتله آنه زينب خويه گول

منهو الگطع نحرك
منهو الكسر صدرك
جسمك فلا ينشال
عكب اخوتي بياحال
لا والي لا خيمه
……………………….

جيتك اشكيلك وضعنه عالترابه مسلّبين
استحيت وشفت حالك هواي اصعب ياحُسين
هذه اخر ليلة يمك. باجر احنه مسافرين
بلا خدر عالنوگ خويه سبي نمشي مچتّفين

يامهجة الهادي
بينه الشمر حادي
ونشاهد الاهوال
عكب اخوتي بياحال
لا والي لا خيمه

سيدزيدالفحام

سيد زيد الفحام, [٢٤.٠٧.٢١ ١١:١١]
قصيدة للخدام 2021

كلشي يالخدام بيده
يرفع ويخفض عبيده
بكيفه يصحاب العزاء
هـوه يرزق ما يشــاء. يالتخدمونه
…………

كلشي بيد حسين من الله كرامه
الخادم اليخلص معاه يرفع مقامه
واليدوّر شُهره بثياب الخدامه
ابواليمه يفضحه باجر بالقيامه

انت يالتتسمّه خادم
نفسك تحاسبها لازم
لا تـفـكّـر بالعطـاء
هـوه يرزق ما يشــاء. يالتخدمونه
…………

لا تدوّر كامره وتصنع اشارات
حسين عالفطره يريدك تقره آهات
عوف دور الخوش تقره وعيش مأسات
كربله، ومن گلبك ابچي عالمصيبات

حسين ميحب المُرائي
صير من گلبك ولائي
لا تهـم بالأرتقـــــاء
هـوه يرزق ما يشـاء. يالتخدمونه
…………

شاعر اهل البيت لازم يكتب آلام
شلون زينب من مشت مسبيه للشام
مو لأن يرضي النفس وتمدحه خدام
هذا بس دنيا نصيبه يعيش ايام

الشاعر الموزون ثگله
يقتدي بعبود غفله
يكتب حروفه بوفاء
هـوه يرزق ما يشــاء. يالتخدمونه
…………

حسين يهوه اليقره واليكتب قصيده
ثنينهم عالفطره كون وعن عقيده
مثل حمزه وكاظم الخادم يريده
يعيش سلطان ويرفعه حسين بيده

الخادم يعيش البساطه
بخدمت المنبر نشاطه
للولي يعوف الثنـاء
هـوه يرزق ما يشــاء. يالتخدمونه
…………

نيّة الخادم اهم من فعله ياناس
اليخدم حسين بوفائه بـ “جون” ينقاس
واليغش حسين ليّظن يرفع الراس
گبل لا يطغه بغروره يسطره عباس

الخادم اليرفع مقامه
گلبه ابيض وي امامه
خامس اصحاب الكساء
هـوه يرزق ما يشــاء. يالتخدمونه
…………

اخوه احنه بخيمة حسين الچبيره
كالعشيره حسينّه شيخ العشيره
هوه يأمرنه ونتبعه ماكو غَيره
بالتواضع والتسامح احله سيره

نخدم حسين بتفاني
واحد يساعد الثاني
والخَدَم كلهم سواء
هـوه يرزق ما يشــاء. يالتخدمونه

سيدزيدالفحام

سيد زيد الفحام, [٠٨.٠٧.٢١ ٢٣:٣١]

محرم_جاي

سيدزيدالفحام

سيد زيد الفحام, [١٤.٠٧.٢١ ٢١:٣٣]
قصيده لأستقبال محرم الحرام

كل الحُسيّنيـات هيّئـوها
راية مصاب حسين نشروها
مشهوده كل عام
ألـكـم يخـــــدّام
لا تقصرون. لا تقصرون
…………..

من هسّه يالخدام همّتكم
كون بمحرّم تسوه وگفتكم
بالمحشر اوسام
ألـكـم يخـــــدّام
لا تقصرون. لا تقصرون
…………..

اگبل محرم يالتعشگونه
خدمو الحسين ولاتعوفونه
تضحيته بالهام
ألـكـم يخـــــدّام
لا تقصرون. لا تقصرون
…………..

ابچوا لمصاب وليدي وجروحه
ذابت يويلي امن السحگ روحه
ونسولف آلام
ألـكـم يخــدّام
لا تقصرون. لا تقصرون
…………..

ذكروا زينب بنتي من راحت سبيه
عالهزل مچتوفه ما بين آل اميه
من عكب عباس سبع الغاضريه
تدخل الشام العقيله الهاشميه

بسوگ النواصب ويلي مشّوها
الماشافو خيال الهه شافوها
قصتها بالشام
ألـكـم يخــدّام
لا تقصرون. لا تقصرون
…………..

كلمن بچه عله حسين منعوفه
نغفر ذنوبه ابدال معروفه
والخدمه ايام
ألـكـم يخـــــدّام
لا تقصرون. لا تقصرون

سيدزيدالفحام

سيد زيد الفحام, [٢٠.٠٧.٢١ ١٠:٤٧]
قصيدة لأستقبال محرم الحرام 2021